Pas raundit dramatik, atij të çerekfinaleve, ku u eliminuan Gjermania dhe Portugalia e Cristiano Ronaldos, “Euro 2024” po hyn ngadalë në fazën e gjysmëfinaleve, që do të luhen të martën dhe të mërkurën.
Përfaqësueset e kualifikuara në gjysmëfinale janë Spanja, Anglia, Franca dhe Holanda.
Prej përfaqësueseve gjysmëfinaliste, Spanja është e vetmja që i ka fituar të gjitha ndeshjet në Gjermani. I ka shënuar 11 gola në pesë ballafaqimet që i ka luajtur.
Ndërkohë, Holanda është përfaqësuesja me sulmin e dytë më të mirë nga ekipet e mbetura në turne, me nëntë gola në pesë ndeshje.
Spanja do të ballafaqohet me Francën nga ora 21:00 në gjysmëfinalen e parë, të martën. Ndeshja do të luhet në stadiumin “Allianz Arena” në Munih.
Gjysmëfinalja tjetër do të jetë ajo mes Anglisë dhe Holandës.
Edhe
Ndeshje të forta, fytyra të reja dhe shumë befasi – Evropiani gjithnjë e më garues
Holanda e Anglia takohen të mërkurën në “Signal Iduna Park” të Dortmundit, në ndeshjen që po ashtu nis në orën 21:00.
Fituesit e këtyre dy çifteve do të luajnë në finalen e madhe të 14 korrikut në “Olimpiastadion” të Berlinit. Deri tani është vlerësuar shumë i suksesshëm Evropiani i organizuar nga UEFA.
Konfederata Evropiane e Futbollit ka menduar edhe për aspektin financiar të shteteve pjesëmarrëse. 331 milionë euro ka qenë totali i parave të ndara për 24 përfaqësueset. Maksimumi i të ardhurave për kampionin e “Euro 2024” do të jetë 28.25 milionë euro. Kjo vlen vetëm për përfaqësueset që i kanë fituar të tria ndeshjet e fazës grupore.
Në “Euro 2024” ka pasur edhe lojtarë të dalluar, të cilët kanë shënuar gola po ashtu. Katër lojtarë e ndajnë epitetin e golashënuesit më të mirë me nga tre gola. Georges Mikautadze i Gjeorgjisë, Jamal Musiala i Gjermanisë, Cody Gakpo i Holandës dhe Ivan Schranz i Sllovakisë. Por prej gjithë këtyre, vetëm Gakpo do të luajë në gjysmëfinale.
Njëmbëdhjetë lojtarë të tjerë janë në listë me nga dy gola. Aty përfshihen edhe dyshja e Anglisë, Harry Kane dhe Jude Bellingham, Kylian Mbappe i Francës dhe Dani Olmo i Spanjës.
Do të ketë edhe lojtarë të suspenduar për ndeshjet gjysmëfinale, por edhe nga ata të cilët shkaku i lëndimeve e kanë humbur pjesën më të rëndësishme të Evropianit.
Edhe
Holanda e Anglia larg formës më të mirë, por shumë pranë finales
Mesfushori i Spanjës, Pedri, do të mungojë për pjesën e mbetur të turneut shkaku i lëndimit të gjurit. Ndërkohë, mbrojtësi i Real Madridit dhe ai i Real Sociedadit, Dani Carvajal dhe Robin Le Normand, janë të suspenduar për gjysmëfinale.
Në duelet e ndërsjella, Spanja është më e suksesshme se Franca me 16 fitore. 13 fitore i ka Franca, kurse shtatë herë dy përfaqësueset e mëdha janë ndarë baras.
Holanda ka më shumë suksese se Anglia në ndeshjet e luajtura mes vete. Holandezët kanë shtatë fitore, gjashtë fitore i kanë shënuar anglezët, kurse nëntë herë këto dy përfaqësuese janë ndarë baras.
Rrugës për në gjysmëfinale Spanja fitoi 3:0 ndaj Kroacisë, e mposhti 1:0 Italinë e me të njëjtin rezultat edhe Shqipërinë, në ndeshjet e Grupit B. Në raundin e një të tetës së finales, Spanja e eliminoi Gjeorgjinë 4:1, kurse Gjermaninë në çerekfinale e mposhti 2:1 në vazhdime.
Franca ishte në Grupin D dhe e nisi kampanjën me fitore 1:0 ndaj Austrisë. Barazoi pa gola me Holandën, dhe luajti 1:1 me Poloninë. Ndaj Belgjikës triumfoi 1:0 në një të tetën e finales, kurse 5:3 e mposhti Portugalinë në çerekfinale.
Edhe
Spanja efikase përballë Francës së Mbappes për vend në finale
Holanda, po ashtu, nuk kishte shkëlqim në fazën grupore, ku ishte bashkë me Francën. Fitoi 2:1 ndaj Polonisë, barazoi 0:0 me Francën dhe humbi 3:2 nga Austria. Por në fazën nokaut, në një të tetën e finales, shkëlqeu me fitore 3:0 ndaj Rumanisë. 2:1 fitoi ndaj Turqisë në çerekfinale, me rikthim të rezultatit në Berlin.
Edhe Anglia u kritikua për paraqitje në Grupin C dhe në fazën nokaut. 1:0 e mposhti Serbinë, barazoi 1:1 me Danimarkën dhe barazoi pa gola me Slloveninë. Më pas në vazhdime fitoi 2:1 ndaj Sllovakisë në një të tetën e finales, kurse 5:3 fitoi në ekzekutimin e penalltive ndaj Zvicrës, për të bërë vend në gjysmëfinale.
