Zelensky: “Shahedët” iraniano-rusë operuan në hapësirën ajrore të NATO-s

Presidenti ukrainas, Volodymyr Zelensky, ka reaguar pas rrëzimit të dronëvre rusë në hapësirën ajrore të Polonisë, duke thënë se sulmet ndaj vendit të tij tregojnë se Moska vazhdon të "shtyjë kufijtë e saj aq sa është e mundur".

"Moska gjithmonë shtyn kufijtë e asaj që është e mundur, dhe nëse nuk has një reagim të fortë, ajo mbetet në nivelin e ri të përshkallëzimit", ka shtuar Zelensky.

Zelensky ka thënë se sulmet "masive" kanë vrarë një person në rajonin e Zhytomyr dhe kanë plagosur tre të tjerë në Volochysk.

“Pesëmbëdhjetë rajone janë shënjestruar gjatë natës në një sulm që përfshinte 415 dronë të llojeve të ndryshme dhe më shumë se 40 raketa kruiz dhe balistike", ka thënë Zelensky.

Sipas tij, dronët iraniano-rusë e kanë shkelur hapësirën ajrore të NATO-s.

"Sot pati një hap tjetër të përshkallëzimit. ‘Shahedët' ruso-iranianë operuan në hapësirën ajrore të Polonisë, në hapësirën ajrore të NATO-s. Nuk ishte vetëm një 'shahed' që mund të quhej aksident, por të paktën tetë dronë sulmues të drejtuar drejt Polonisë”, ka thënë po ashtu presidenti ukrainas.