Forcat ruse kanë "shkatërruar" qytetin lindor të Ukrainës, Bakhmut, ka thënë presidenti ukrainas, Volodymyr Zelensky, ndërsa ushtria e Ukrainës raportoi sulme me raketa ajrore në pjesë të shumta të vendit.
Betejat e fundit të luftës nëntë mujore e gjysmë të Rusisë në Ukrainë janë përqendruar në katër provinca, që presidenti rus Vladimir Putin, pretendoi ilegalisht se i kishte aneksuar në fund të shtatorit, raportoi Associated Press.
Luftimet tregojnë luftën e Moskës për të vendosur kontrollin e rajoneve dhe vendosmërinë e Ukrainës për t'i rimarrë ato.
Zelensky ka thënë se situata “mbetet shumë e vështirë” në disa qytete të vijës së frontit në provincat Donetsk dhe Luhansk të Ukrainës lindore.
Së bashku, provincat përbëjnë Donbasin, një rajon industrial i shtrirë në kufi me Rusinë që Putin e identifikoi si një fokus që në fillim të luftës, ku separatistët e mbështetur nga Moska kanë luftuar që nga viti 2014.
Edhe
Rusia intensifikon sulmet në lindje të Ukrainës
“Bakhmut, Soledar, Maryinka, Kreminna. Për një kohë të gjatë, në tokën e këtyre zonave nuk ka mbetur asnjë vend banimi që nuk është dëmtuar nga predha dhe zjarri”, ka thënë Zelensky në fjalimin e tij të natës të premten.
“Okupatorët në fakt shkatërruan Bakhmutin, një qytet tjetër të Donbasit që ushtria ruse e ktheu në gërmadha të djegura”, ka shtuar ai.
