-
Përktheu:
Forca Jashari dhe Flutura Gashi-Mehmeti
- 2 maj 2024 11:57
- Shpërndaje në:
Komisioni Evropian ka njoftuar të enjten për një paketë të ndihmës në vlerë prej 1 miliard dollarësh për Libanin.
Sipas vendimit, shumica e ndihmës do të shkojë për forcimin e kontrolleve të kufijve, për të ndaluar fluksin e azilkërkuesve dhe emigrantëve nga vendi i vogël, i përfshirë nga kriza përtej detit Mesdhe drejt Qipros dhe Italisë, raporton AP.
Presidentja e Komisionit Evropian, Ursula von der Leyen ka thënë se ndihma do të shpërndahet ndërmjet këtij viti dhe deri në vitin 2027, gjatë një vizite në Bejrut, bashkë me presidentin e Qipros, Nikos Christodoulides.
Von der Leyen ka thënë se Evropa do të vazhdojë gjithashtu të ruajë "rrugët ligjore" për rivendosjen e refugjatëve në Evropë.
Kryeministri i Libanit, Najib Mikati e ka vlerësuar ndihmën, duke thënë se “Siguria e Libanit është siguri për shtetet e Evropës dhe anasjelltas.
Edhe
BE-ja ndan 1 miliard euro shtesë për ta ndihmuar Turqinë me refugjatët sirianë
Libani i cili ka vuajtur disa kriza financiare që nga viti 2019, mban afërsisht 785,000 refugjatë sirianë të regjistruar, dhe qindra e mijëra të tjerë që janë të paregjistruar.
Von der Leyen dhe presidenti i Qipros takohen në Liban për çështjen e migrimit
Presidentja e Komisionit Evropian, Ursula von der Leyen dhe presidenti i Qipros, Nikos Christodoulides do të zhvillojnë një sërë takimesh në Bejrut me zyrtarët libanezë për të diskutuar rreth synimit për frenimin e emigrimit.
Qeveria qipriote ka bërë të ditur se si shkak i zhvillimit të ulët ekonomik, të shoqëruar nga lufta Izrael-Hamas dhe sulmet e fundit mes Izraelit dhe Libanit, një numër i madh emigrantësh, kryesisht sirianë, kanë rezultuar të arrijnë në Qipro.
Sipas Organizatës Ndërkombëtare për Migracionin, 3 mijë sirianë janë larguar nga Libani që nga janari, krahasuar me 4.500 gjatë gjithë vitit të kaluar, raporton “Associated Press”.
Si përgjigje, Qiproja ka pezulluar përpunimin e kërkesave për azil nga shtetasit sirianë në fillim të këtij muaji për shkak të numrit të madh të tyre.
Edhe
Shefi i OKB-së: Prania e Izraelit në Liban duhet të përfundojë
Autoritetet qipriote thuhet se kanë dërguar anije patrullimi jashtë ujërave territoriale libaneze për të penguar anijet e refugjatëve që përpiqen të nisen për në Qipro.
Ndihma e pakët e ofruar për refugjatët sirianë ka shtyrë shumë të largohen nga Libani drejt një jete më të mirë në Evropë.
