Izmiri, qyteti i tretë më i madh në Turqi, është i prekur nga thatësira për shkak të ngrohjes globale. Akumulimet e digave në qytetin që ndodhet në bregdetin e detit Egje janë shqetësuese dhe reshjet nuk priten në të ardhmen e afërt. Në fakt, i gjithë vendi është në rrezik.
Siç shkruan Daily Sabah, rajoni mesdhetar i Turqisë është veçanërisht i ekspozuar ndaj ngrohjes globale. Temperaturat mesatare po rriten. Ministria e Mbrojtjes së Mjedisit bëri të ditur se një pjesë e Izmirit është përfshirë nga një thatësirë shumë e rëndë, ndërsa pjesa tjetër do të përfshihet edhe nga një thatësirë më e rëndë.
Eksperti i klimës dhe profesori universitar Dogan Yasar tregoi se Diga Tahtali, si burimi kryesor i ujit në Izmir, ishte plot 55 për qind vitin e kaluar dhe se aktualisht është plot 39 për qind. Ai paralajmëroi se Turqia mund të goditet nga mungesa më e madhe e ujit ndonjëherë këtë verë.
Temperatura në Izmir është tre gradë Celsius më e lartë se temperatura mesatare e viteve të mëparshme. Numri mesatar i ditëve me shi, të cilat ishin 13 muajin e kaluar, ka rënë në gjashtë deri në shtatë.
“Thatësira është shumë e rëndë, sepse ne kemi shteruar ujërat nëntokësore. Liqenet janë tharë dhe duken si një shkretëtirë. Fusha e Konisë është e mbushur me gropa dhe më shumë se 50 liqene dhe ligatina janë tharë, dhe ujërat nëntokësore ushqehen nga liqenet dhe ligatinat. Ne nuk e menaxhuam ujin dhe pastaj fajësuam ndryshimet klimatike", ka thënë Yasar.
Diga Tahtali nuk është e vetmja ku rezervuari është reduktuar. Kështu ndodh edhe me digat Balcova, Urkmez, Alaçati Kutlu Aktas dhe Guzelhisar. Yasar foli edhe për mungesën e mundshme të ujit në Turqi këtë vit.
“Ne patëm dhjetorin dhe janarin më të ngrohtë në 52 vitet e fundit, pa shi. Nëntori, dhjetori, janari dhe shkurti janë shumë të rëndësishëm për digat, por ne kemi arritur në fund të janarit dhe ende asgjë. Ky është një problem kaq serioz dhe kjo do të rezultojë me mungesë uji këtë verë, dhe për rrjedhojë një thatësirë të rëndë bujqësore”, shpjegoi ai.
Edhe
Bora zbardh verilindjen e Turqisë kur rajonet e tjera po përballen me zjarre
Yasar beson se ka një problem të madh në menaxhimin e ujit, dhe vuri në dukje se së shpejti do të miratohet një ligj që ka të bëjë me konsumin e ujit, dhe kjo vlen veçanërisht për ujërat nëntokësore.
“Ujërat nëntokësore, që tani i kemi shfrytëzuar, duhet t'i kishim përdorur në vitet e thata. Nuk ka misër, sidomos në juglindje. Gruri dhe elbi nuk mund të mbijnë, dhe të mbjellat ndoshta mund të nxirren dhe të rimbjellen. E gjithë kjo është menaxhim i dobët i burimeve ujore dhe për fat të keq ne fajësojmë ndryshimet klimatike. Ne jemi fajtorë, duhet të mësojmë se si ta përdorim ujin”, ks zjëmë ai.
Ai kujtoi se Turqia do të jetë ndër vendet që do të preken më shumë nga ndryshimet klimatike, ndër të cilat janë Spanja, Italia dhe Greqia.
