Turqia e Armenia ulen në tryezë të bisedimeve për herë të parë më 14 janar

Të dërguarit specialë nga Turqia dhe Armenia do të mbajnë takimin e tyre të parë me qëllim normalizimin e marrëdhënieve të tyre, më 14 janar në Moskë, njoftoi të mërkurën Ministria e Jashtme e Turqisë.

Dy fqinjët, të cilët nuk kanë lidhje diplomatike, ranë dakord muajin e kaluar të emërojnë përfaqësues të posaçëm, të cilët do të diskutonin mënyrat e vendosjes së lidhjeve formale, dhe t'i jepnin fund viteve të marrëdhënieve të tensionuara.

Turqia dhe Armenia shpresojnë gjithashtu të rifillojnë fluturimet çarter midis Stambollit dhe Jerevanit.

Masa shihet si pjesë e një përpjekjeje për t'i dhënë fund tensioneve në rajonin e Kaukazit. Është gjithashtu pjesë e përpjekjeve të Turqisë për t'u pajtuar me një numër vendesh me të cilat ka rënë në konflikt, duke përfshirë Egjiptin, Emiratet e Bashkuara Arabe dhe Arabinë Saudite, dhe për t'i dhënë fund izolimit të saj rajonal.

Një deklaratë e Ministrisë së Jashtme nuk dha detaje të mëtejshme për takimin që do të mbahet në Moskë. Turqia emëroi Serdar Kiliç, një ish-ambasador në Shtetet e Bashkuara si përfaqësuesin e saj të posaçëm, ndërsa Armenia emëroi zëvendëskryetarin e parlamentit Ruben Rubinyan.