Teherani do t'i rindërtojë objektet e tij bërthamore, thotë presidenti i Iranit

Presidenti i Iranit, Masoud Pezeshkian, ka deklaruar se Teherani do të rindërtojë objektet e tij bërthamore "me forcë më të madhe".

Duke folur për mediat shtetërore të dielën, Pezeshkian ka thënë se vendi nuk synon armët bërthamore.

Presidenti i SHBA-së, Donald Trump, ka paralajmëruar se do të urdhërojë sulme të reja ndaj objekteve bërthamore të Iranit nëse Teherani përpiqet të rindërtojë objektet që Shtetet e Bashkuara bombarduan në qershor.

Pezeshkian i bëri komentet e tij gjatë një vizite në Organizatën e Energjisë Atomike të vendit, gjatë së cilës u takua me menaxherë të lartë nga industria bërthamore e Iranit.

"Shkatërrimi i ndërtesave dhe fabrikave nuk do të krijojë problem për ne, ne do t'i rindërtojmë dhe me forcë më të madhe", është shprehur presidenti iranian për mediat shtetërore.

Edhe Botë 21 qer 2026 Irani thotë se SHBA-ja duhet ta pranojë të drejtën e tij për pasurim të uraniumit

Në qershor, SHBA-ja ka nisur sulme ndaj objekteve bërthamore iraniane që Uashingtoni thotë se ishin pjesë e një programi të orientuar drejt zhvillimit të armëve bërthamore. Teherani pohon se programi i tij bërthamor është thjesht për qëllime civile.

"E gjitha ka për qëllim zgjidhjen e problemeve të popullit, për sëmundjet, për shëndetin e popullit", ka thënë Pezeshkian duke iu referuar aktiviteteve bërthamore të Iranit.