Talebanët vështirësojnë edhe më tej jetën e grave, dalin me një urdhëresë të re

Talebanët kanë urdhëruar që sallonet e bukurisë dhe flokëve në Afganistan të mbyllen në kufizimet e fundit që u janë bërë grave.

Autoritetet afgane kanë thënë se bizneset kanë afat një muaj që të përfundojnë të gjitha aktivitetet, duke filluar nga 2 korriku kur fillimisht ishin njoftuar.

Liritë e grave janë kufizuar që kur talebanët kanë marrë pushtetin në vitin 2021, raportoi BBC.

Ata kanë ndaluar vajzat dhe gratë nga shkollat, palestrat dhe parqet, dhe së fundmi i ndaluan edhe që të punojnë për Kombet e Bashkuara.

Talebanët po ashtu kanë vënë rregulla për veshjen e grave, në atë mënyrë që ato të zbulojnë vetëm sytë dhe duhet të shoqërohen nga një i afërm mashkull nëse duan të udhëtojnë për më shumë se 72 kilometra.

Kufizimet kanë vazhduar edhe pas dënimit të ndërkombëtarëve dhe protestave të grave e aktivistëve që kanë folur në krah të tyre.