Sllovenia gati për bisedime koalicioni pas zgjedhjeve me rezultat të ngushtë

Partitë politike në Slloveni janë shprehur të gatshme për bisedime urgjente për koalicion të hënën, pasi nga zgjedhjet parlamentare të së dielës nuk doli një fitues i qartë, gjë që mund të ndikojë në agjendën e brendshme dhe të jashtme të vendit alpin.

Partia liberale Lëvizja e Lirisë (GS) e kryeministrit Robert Golob ishte pothuajse në barazim të plotë me Partinë Demokratike Sllovene (SDS) me prirje të djathtë, e udhëhequr nga ish-kryeministri populist Janez Jansha, pas pothuajse të gjitha votave të numëruara nga zgjedhjet e së dielës.

Siç qëndron situata, asnjëra nuk do të sigurojë 46 vendet e nevojshme për shumicë në parlamentin me 90 vende, duke i bërë faktorë vendimtarë partitë më të vogla që kalojnë pragun prej 4%.
Disa analistë shprehën frikë për paqëndrueshmëri politike pas rezultatit të ngushtë. 

“Në fund të ditës, ka shumë gjasa që do të shohim një qeveri të re që nuk do të jetë e qëndrueshme”, ka thënë analisti politik Miha Kovaq.

Në një fjalim herët të hënën, Golob ka thënë se partia e tij është gati të nisë bisedimet për koalicion për të zbatuar programin zgjedhor të GS-së, i cili fokusohet në përmirësime në shëndetësinë publike, arsim dhe ekonomi.

“Për të gjitha këto masa, na duhet më shumë sesa një shumicë e dobët”, ka thënë Golob, duke shtuar se do të ftojë “të gjitha partitë demokratike” në parlament për diskutime.

Bazuar në 99.85% të votave të numëruara, GS ka fituar 29 vende, e ndjekur nga afër nga SDS me 28 vende. Së bashku me partitë më të vogla që zakonisht i kanë mbështetur, GS do të kishte 40 deputetë, ndërsa SDS do të kishte 43 vende.

Jansha, i cili kandidonte për një mandat të katërt si kryeministër, ka thënë se SDS-ja do të presë rezultatet përfundimtare para se të nisë bisedimet për koalicion, duke shpresuar se mund të dalë një diferencë e ngushtë në favor të tij.

Jansha, një admirues i presidentit amerikan Donald Trump dhe aleat i kryeministrit nacionalist hungarez Viktor Orban, akuzoi komisionin zgjedhor për numërim të pasaktë, duke thënë se ekipi i tij i monitorimit kishte vërejtur një mospërputhje që e linte SDS-së me 50,000 vota më pak. Ai nuk ka dhënë prova për këtë pretendim.

Sllovenia, një vend anëtar i Bashkimit Evropian me rreth 2 milionë banorë, fitoi pavarësinë nga Jugosllavia në shpërbërje në vitin 1991. Mungesa e konflikteve dhe një bazë e fortë industriale e kanë ndihmuar vendin të ecë më mirë se shumë shtete të tjera të Ballkanit që nga ajo kohë.