Janez Jansha është zgjedhur të premten kryeministër i ri i Sllovenisë, duke marrë për herë të katërt drejtimin e qeverisë së vendit.
Asambleja Shtetërore e Sllovenisë e votoi liderin e Partisë Demokratike Sllovene (SDS) me 51 vota pro dhe 36 kundër në një votim të fshehtë, raportoi agjencia STA.
Me këtë votim, Jansha mori mandatin për formimin e qeverisë së tij të katërt, e cila do të jetë qeveria e 16-të në historinë e Sllovenisë. Brenda 15 ditësh, ai duhet t’i propozojë parlamentit emrat e ministrave të rinj.
Pas zgjedhjes, Jansha bëri betimin para deputetëve, duke premtuar se do ta respektojë rendin kushtetues dhe do të punojë “me të gjitha forcat për të mirën e Sllovenisë”.
Një ditë më parë, ai nënshkroi marrëveshje koalicioni me partitë Sllovenia e Re (NSi), Partia Popullore Sllovene (SLS), Fokus dhe Demokratët, me të cilat po formon shumicën qeverisëse. Mbështetje për Janshën dhanë edhe deputetët e partisë Resnica, megjithëse kjo parti nuk do të jetë pjesë e kabinetit qeveritar.
Koalicioni i ri ka 48 nga 90 ulëset në parlament, ndërsa Jansha pritet të sigurojë mbështetje shtesë edhe nga deputetët e pakicave kombëtare dhe një deputet opozitar.
Edhe
Sllovenia gati për bisedime koalicioni pas zgjedhjeve me rezultat të ngushtë
Në prioritetet e qeverisë së re, Jansha përmendi përfundimin e procesit të demokratizimit, zhvillimin ekonomik, luftën kundër korrupsionit dhe krimit të organizuar, si dhe decentralizimin dhe uljen e burokracisë.
Jansha njihet si politikan populist dhe mbështetës i presidentit të Shteteve të Bashkuara të Amerikës, Donald Trump.
Qeveria e re do ta pasojë kabinetin në largim të Robert Golobit, i cili megjithëse kishte fituar zgjedhjet e marsit me rezultat të ngushtë, nuk arriti të formojë qeverinë.
