Shefi i agjencisë bërthamore: S’ka asnjë provë se Irani po ndërtonte armë bërthamore

Një zyrtar i lartë i Shtëpisë së Bardhë ka thënë se pikëpamja e tyre përputhet me atë të Agjencisë Ndërkombëtare të Energjisë Atomike (IAEA) lidhur me programin bërthamor të Iranit, ka raportuar SkyNews. Megjithatë kjo media ka raportuar tutje se kjo është kundërshtuar pjesërisht nga shefi i Agjencisë. 

Shefi i IAEA, Rafael Mariano Grossi, ka thënë se derisa nuk ka pasur prova se Irani po ndërtonte një bombë bërthamore po ashtu ekipit të tij nuk i është dhënë qasje në programin bërthamor, e kjo sipas tij ka qenë  shqetësim serioz. 

“Kam qenë shumë i qartë dhe konsistent në raportet e mia mbi programin bërthamor të Iranit: ndërsa nuk ka pasur prova se Irani po ndërton një bombë bërthamore, rezervat e tij të mëdha të uraniumit të pasuruar pothuajse të nivelit të armëve dhe refuzimi për t'u dhënë inspektorëve të mi qasje të plotë janë shkak për shqetësim serioz. Për këto arsye, raportet e mia të mëparshme tregojnë se nëse dhe derisa Irani të ndihmojë IAEA-në në zgjidhjen e çështjeve të pazgjidhura të mbrojtjes, agjencia nuk do të jetë në gjendje të ofrojë siguri se programi bërthamor i Iranit është ekskluzivisht paqësor”, ka shkruar ai.

Ndërkohë, SkyNews ka përfshirë raportimin e një prej gazetarëve të medias i cili ka përcjellë deklaratën e Grossit. 

“Irani mund të ketë qenë ditë apo javë larg nga një armë nëse ata do të përpiqeshin për këtë. Dhe ata kishin të gjithë kapacitetin për ta përmbushur këtë”, ka cituar gazetari Mark Stone – Grossin.