Zëdhënësi i Këshillit të Sigurisë Kombëtare të Shtëpisë së Bardhë, John Kirby, ka konfirmuar të mërkurën vdekjen e shtetasit të dytë amerikan në Sudan, raportoi “Fox News”.
Në një adresim për shtyp, Kirby ka thënë se amerikani, identiteti i të cilit ende nuk dihet, vdiq të martën.
“I shprehim ngushëllimet tona më të thella familjes. Ne vazhdojmë t'i bëjmë të qartë në nivelet më të larta të qeverisë sonë udhëheqjes së Forcave të Armatosura Sudaneze dhe Forcave të Mbështetjes së Shpejtë se ato janë përgjegjëse për sigurimin e mbrojtjes së civilëve, duke përfshirë njerëzit nga vendet e treta dhe stafin humanitar që po punojnë për të shpëtuar jetë”, ka thënë ai.
Kirby gjithashtu përmendi armëpushimin e ndërmjetësuar nga SHBA-ja që filloi në mesnatën e 24 prillit.
"Megjithëse ka disa raportime për dhunë dhe granatime sporadike dhe të shtëna me armë zjarri, ne jemi të lumtur të shohim se nivelet e dhunës në përgjithësi duket se kanë rënë ndjeshëm. U bëjmë thirrje të dy fraksioneve ushtarake që të respektojnë plotësisht armëpushimin dhe ta zgjasin më tej atë”, ka shtuar ai.
Të paktën 459 njerëz, përfshirë civilë dhe luftëtarë, janë vrarë dhe mbi katër mijë janë plagosur që nga fillimi i luftimeve, tha agjencia shëndetësore e OKB-së, duke cituar Ministrinë e Shëndetësisë të Sudanit.
Armëpushimi 72-orësh i shpallur nga Sekretari Amerikan i Shtetit Antony Blinken do të zgjaste deri në orët e vona të mbrëmjes së të enjtes.
Kirby tha të mërkurën se SHBA-ja mbetet e përqendruar në zgjatjen e armëpushimit për një periudhë domethënëse kohore.
"Unë thjesht dua të theksoj se ne kemi pezulluar operacionet në ambasadë, por ne nuk kemi prishur marrëdhëniet tona diplomatike apo mekanizmat për të kryer marrëdhënie diplomatike me Sudanin. Ne thjesht po zhvendosim personelin e ambasadës jashtë vendit. Ende ka një ambasador në Sudan, John Godfrey, dhe ai ka bërë një punë të shkëlqyer dhe do të vazhdojë të kryejë detyrat e tij nga jashtë vendit”, është shprehur ai.