Shtetet e Bashkuara të Amerikës nuk janë të shqetësuara për avancimin e forcave ukrainase në rajonin rus Kursk, ka thënë të premten zëdhënësja e Pentagonit, Sabrina Singh.
Sipas saj, nëse presidenti rus Vladimir Putin do ta shtensionojë situatën mund t’i tërheqë trupat nga Ukraina.
“Jo, sepse në fund të ditës, Ukraina po lufton për territorin e saj sovran që është nën sulm nga një vend fqinj. Pra, nëse duam të ulim tensionet, siç kemi thënë që nga fillimi, mënyra më e mirë për ta bërë këtë është që Putini të marrë vendim sot për tërheqjen e forcave të tij nga Ukraina”, ka thënë Singh kur u pyet për përshkallëzimin e mundshëm të tensioneve për shkak të hyrjes së forcave ukrainase në rajonin e Kurskut.
Zëdhënësja e Pentagonit theksoi se Ukraina po bën gjithçka për të vazhduar çlirimin e territorit të saj sovran dhe ngjarjet në rajonin e Kurskut përshtaten në këtë skenar.
“Ne do të vazhdojmë të mbështesim Ukrainën me sistemet që i duhen. Ne nuk e shohim këtë si një përshkallëzim në asnjë kuptim. Ukraina po bën atë që duhet të bëjë për të qenë e suksesshme në fushën e betejës”, ka thënë ajo.
Edhe
Ushtarët ukrainas në Kursk nuk janë të rrethuar, pavarësisht pretendimeve të Putinit dhe Trumpit
Ajo theksoi se përparimi i Ukrainës në rajonin e Kurskut është në përputhje me politikën e SHBA-së, megjithëse vuri në dukje se SHBA-ja është ende kundër sulmeve me rreze të gjatë në territorin rus.
Luftimet në rajonin rus Kursk kanë hyrë në ditën e katërt radhazi. Megjithëse nuk ka informacione të sakta, ushtria ukrainase thuhet se ka depërtuar 35 kilometra thellë në territorin rus.
