-
Përktheu:
Flutura Gashi-Mehmeti
- 30 qershor 2025 11:15
- Shpërndaje në:
SHBA-ja duhet të përjashtojë çdo sulm të mëtejshëm ndaj Iranit nëse do të rifillojë bisedimet diplomatike, i ka thënë BBC-së zëvendësministri i jashtëm i Teheranit, Majid Takht Ravanchi.
Sipas tij, administrata Trump i ka thënë Iranit nëpërmjet ndërmjetësve se dëshironte të kthehet në negociata këtë javë, por nuk e kishte bërë të qartë qëndrimin e saj mbi "çështjen shumë të rëndësishme" të sulmeve të mëtejshme ndërsa bisedimet zhvillohen.
SHBA-ja dhe Irani ishin të përfshira në bisedime mbi programin bërthamor të Iranit kur Izraeli goditi vendet bërthamore dhe infrastrukturën ushtarake iraniane në fillim të këtij muaji dhe Irani u përgjigj me raketa.
SHBA-ja më pas u përfshi drejtpërdrejt në konflikt më 21 qershor duke bombarduar tri nga vendet bërthamore të Iranit.
Takht-Ravanchi ka thënë gjithashtu se Irani do të vazhdojë të këmbëngul që të ishte në gjendje të pasuronte uraniumin për atë që thotë se janë qëllime paqësore, duke hedhur poshtë akuzat se po lëviz fshehurazi drejt zhvillimit të një bombe bërthamore.
Ai ka thënë se Iranit i është "mohuar qasja në material bërthamor" për programin e tij kërkimor, kështu që ata duhej "të mbështeteshin te vetja".
"Niveli i kësaj mund të diskutohet, kapaciteti mund të diskutohet, por të thuash që nuk duhet të kesh pasurim, duhet të kesh zero pasurim, dhe nëse nuk je dakord, ne do të të bombardojmë - ky është ligji i xhunglës", ka thënë zëvendësministri i Jashtëm.
Izraeli filloi sulmet e tij, duke synuar vendet bërthamore dhe ushtarake, si dhe duke vrarë komandantë dhe shkencëtarë, në Iran më 13 qershor, me pretendimin se Teherani ishte afër ndërtimit të një arme bërthamore.
Irani është përgjigjur duke sulmuar Izraelin dhe armiqësitë vazhduan për 12 ditë, gjatë së cilës kohë SHBA-ja ka hedhur bomba në tri nga vendet bërthamore të Iranit: Fordoë, Natanz dhe Isfahan.
Shkalla e dëmit të shkaktuar në programin bërthamor të Iranit nga sulmet amerikane ka qenë e paqartë, dhe Takht-Ravanchi ka thënë se nuk mund të jepte një vlerësim të saktë.
Rafael Grossi, kreu i Agjencisë Ndërkombëtare të Energjisë Atomike (IAEA), ka thënë të shtunën se sulmet shkaktuan dëme të rënda, por "jo totale", teksa presidenti i SHBA-së Donald Trump pretendon se objektet bërthamore të Iranit janë3 "shkatërruar plotësisht".
Grossi ka thënë gjithashtu se Irani ka kapacitetin për të filluar përsëri pasurimin e uraniumit brenda "pak muajsh". Në përgjigje, Takht-Ravanchi ka thënë se nuk e dinte nëse do të ishte kështu.
Marrëdhënia e Iranit me IAEA-në është bërë gjithnjë e më e tensionuar. Të mërkurën, parlamenti i saj vendosi të pezullojë bashkëpunimin me mbikëqyrësin atomik, duke akuzuar IAEA-n se po mban anën e Izraelit dhe SHBA-së.
