Shangai: E shpallën të vdekur dhe e futën në qese, por del se ishte gjallë

Gjashtë persona janë nën hetim në Shangai pasi një banore e një shtëpie për të moshuar gabimisht u shpall e vdekur, u fut në qese dhe u dërgua në një automjet funeralesh në pritje deri kur punonjësit e morgut vërejtën se ishte ende gjallë, raportoi The Guardian të martën.

Pamjet e incidentit u shpërndanë në internet duke nxitur reagime të ashpra. Nxiti shqetësime edhe për sistemin mjekësor të vendit.

Në pamje, punonjësit me rroba mbrojtëse shihen duke e nxjerrë trupin nga automjeti i morgut. Ata shikojnë brenda qeses dhe kuptojnë se personi është ende gjallë.

“Gjallë. A e pe këtë? Gjallë”, thotë njëri. “Mos e mbulo më”, thotë një tjetër.

Policia tha se pesë zyrtarë, përfshirë drejtorin e shtëpisë së të moshuarve dhe një mjek, janë nën hetim.