Marshime pro-ruse janë organizuar të hënën në Serbi dhe në entitetin e drejtuar nga serbët në Bosnjë-Hercegovinë, në ditën kur janë mbajtur ceremoni për të shënuar humbjen e Gjermanisë naziste në Luftën e Dytë Botërore.
Serbia organizoi fluturime me avion ushtarak dhe zyrtarët vendosën kurora me lule si pjesë e festimeve.
Një ministër i kabinetit serb dhe ambasadori i Rusisë në Serbi iu bashkuan dhjetëra njerëzve në marshimin e mbështetur nga Moska në Beograd, një ngjarje vjetore që pasqyron atë që festohet në Rusi për t’i nderuar viktimat e Luftës së Dytë Botërore.
Marshuesit mbanin flamuj dhe pankarta pro-ruse, si dhe figurën e presidentit rus, Vladimir Putin, dhe shenjën e madhe “Z” që simbolizon mbështetjen për pushtimin rus të Ukrainës.
Serbia në Kombet e Bashkuara ka dënuar sulmin rus, por ka refuzuar të vendosë sanksione kundër Moskës – pavarësisht se zyrtarisht kërkon të anëtarësohet në Bashkimin Evropian.
Edhe
Në gjithë botën protestohet kundër Rusisë, në Serbi marsh pro saj
Ndjenjat pro-ruse dhe mbështetja për pushtimin mbeten të larta në Serbi dhe në mesin e serbëve të Bosnjës, udhëheqësit populistë të të cilëve kanë nxitur marrëdhënie të ngushta me Putinin.
Në qytetin kryesor serb të Bosnjës, Banja Luka, zyrtarët e lartë dhe ambasadori rus në Bosnje morën pjesë në marshimin që përfshinte pankarta që mbështesnin hapur pushtimin rus.
"Sot është dita e paralajmërimit, sepse ne shohim se neo-nazizmi ngre kokën. Të gjithë do t'i arrijmë qëllimet tona dhe do të arrijmë atje ku duhet", u tha gazetarëve ambasadori Igor Kalabuhov.
Ambasada e Ukrainës në Beograd kritikoi Serbinë, duke thënë se zyrtarët e ambasadës shënuan Ditën e Fitores të dielën, pa praninë e zyrtarëve serbë.
Ambasada thuhet në deklaratë, “nuk ka të drejtën morale dhe dëshirën njerëzore për të nderuar viktimat e Luftës së Dytë Botërore së bashku me përfaqësuesit e regjimit kriminal të Putinit”.
Qindra familje të viktimave të luftës në Bosnjë-Hercegovinë janë mbledhur në Sarajevë në mbështetje të Ukrainës.
Edhe
Putin: Vuçiqi erdhi në Moskë edhe pse u përpoqën ta ndalnin
Nënat e Srebrenicës bashkë me familjet e fëmijëve të vrarë në Sarajevë kanë mbajtur pankarta në përkrahje të njerëzve në Mariupol.
Ato kanë vendosur kurora lulesh në memorialin për fëmijët e vrarë në luftë dhe kanë thënë se e kuptojnë fort mirë dhimbjen dhe vuajtjen e ukrainasve.
