-
Përktheu:
Flutura Gashi-Mehmeti
- 10 qershor 2025 19:01
- Shpërndaje në:
Komisioni Evropian propozoi të martën një paketë të 18-të sanksionesh kundër Rusisë për pushtimin e Ukrainës, që synon të ardhurat e Moskës nga energjia, bankat e saj dhe industrinë e saj ushtarake.
Paketa e re propozon ndalimin e transaksioneve me tubacionet e gazit Nord Stream të Rusisë, si dhe bankat që angazhohen në anashkalimin e sanksioneve.
"Qëllimi i Rusisë nuk është paqja, është të imponojë sundimin e fuqisë... forca është e vetmja gjuhë që Rusia do ta kuptojë”, ka thënë presidentja e Komisionit Ursula von der Leyen në një konferencë për shtyp, raporton AP.
Komisioni propozon shtimin e 22 bankave të tjera ruse në listën e tij dhe zgjerimin e kufizimeve mbi to përtej heqjes nga SËIFT, një sistem global i mesazheve financiare, në një ndalim të plotë të transaksioneve.
Ai gjithashtu propozon zgjerimin e fushëveprimit për bankat nga vendet e treta, dhe liston Fondin Rus të Investimeve Direkte (RDIF), si dhe degët e tij dhe rrjetin më të gjerë.
Komisioni ka propozuar gjithashtu uljen e çmimit të kufizuar të Grupit të Shtatë Vendeve (G7) për naftën bruto ruse në 45 dollarë për fuçi, nga 60 dollarë për fuçi, në një përpjekje për të ulur të ardhurat e energjisë së Rusisë.
Von der Leyen ka thënë se kufiri i çmimit të naftës do të diskutohet në një takim të liderëve të G7 në Kanada javën e ardhshme.
Propozimi gjithashtu liston më shumë anije që përbëjnë flotën në hije të Rusisë, duke e çuar totalin në më shumë se 400 anije, dhe kompani tregtare nafte. Komisioni ka propozuar gjithashtu një ndalim të importit të produkteve të rafinuara të prodhuara nga nafta ruse.
"Në këtë mënyrë, ne duam të parandalojmë që një pjesë e naftës bruto ruse të arrijë në tregun e BE-së përmes derës së pasme”, ka thënë von der Leyen.
