Zyrtarët rusë denoncuan të hënën komentet e presidentit francez Emmanuel Macron se Moska po bëhet e nënshtruar ndaj Kinës, duke thënë se vendet perëndimore duhet të mësohen me marrëdhëniet e ngushta mes Kremlinit dhe Pekinit.
Kritika ruse u përqendrua në një intervistë që Macroni dha për të përditshmen e Parisit l'Opinion, në të cilën ai dënoi izolimin e Kremlinit të shkaktuar nga pushtimi i Ukrainës më shumë se 14 muaj më parë.
“(Rusia) ka nisur de fakto një formë vasalizimi me Kinën dhe ka humbur qasjen në Balltik që ishte kritike për të pasi ka përshpejtuar vendimin e Suedisë dhe Finlandës për t'u bashkuar me NATO-n”, citohet të ketë thënë Macron në të përditshmen.
“Kjo ishte e paimagjinueshme dy vjet më parë”, shkruan NBC News.
Polemika u përqendrua në bisedimet në Moskë në mars midis udhëheqësit të Kremlinit Vladimir Putin dhe presidentit kinez Xi Jinping, në të cilat ata thanë se po thellonin partneritetin e tyre strategjik duke hyrë në një “epokë të re” lidhjesh.
Zëdhënësi i Kremlinit, Dmitry Peskov tha se marrëdhëniet e Rusisë me Kinën ishin ato të një partneri strategjik dhe nuk kishin asnjë lidhje me varësinë.
Zëvendësministri i Jashtëm rus Aleksandër Grushko tha se Parisi ishte i preokupuar me marrëdhëniet e forcuara të Moskës me Kinën dhe ndryshimet në rendin botëror.
“Perëndimi në përgjithësi duket i frikësuar nga formimi i një sistemi vërtet shumëpalësh të marrëdhënieve ndërkombëtare para syve tanë, një sistem që përfshin disa qendra të pavarura të veçanta, veçanërisht Rusinë dhe Kinën”, shkroi Grushko në një deklaratë në faqen e internetit të ministrisë.