Ndërsa përsëriten zgjedhjet lokale në Stamboll, disa anketime treguan në avantazh kandidatin e opozitës Ekrem Imamoglu, i cili pati fituar zgjedhjet e anuluara të datës 31 mars. Edhe sot, opozita u fokusua tek mesazhi i ndreqjes së demokracisë së dëmtuar të vendit dhe tek varfëria urbane që është zgjeruar që pas recensionit të vitit 2018. Nëse Imamoglu fiton edhe rivotimin e sotshëm, Stambolli shkëputet pas 25 vitesh nga kontrolli i partisë së presidentit Erdogan.
Përsëritja e votimeve në qytetin më të madh të Turqisë mund të sjellë humbjen e kontrollit mbi Stambollin nga Presidenti Recep Tayyip Erdogan dhe administrata e tij për herë të parë pas 25 vitesh.
Kandidati i opozitës 49-vjeçari Ekrem Imamoglu, i partisë CHP, fitoi me rezultat të ngushtë ndaj kandidatit të qeverisë në zgjedhjet lokale të 31 marsit dhe madje mori detyrën e kryetarit të bashkisë së Stambollit për vetëm tre javë.
Zgjedhjet u anuluan pasi qeveria ankimoi parregullsitë procedurale dhe procesin e rinumërimit.
Pas fitores së parë dhe një zmbrapsjeje të hidhur ndaj kontrollit të presidentit Erdogan, Imamoglu u fokusua gjatë ripërballjes së ashpër elektorale tek varfëria në qytete, pasi vendi hyri në recension në fund të vitit të kaluar.
Edhe
Turqit godasin Erdoganin në zgjedhjet lokale, opozita fiton bindshëm
“Këtu nuk zgjidhet vetëm kryebashkiaku i Stambollit. Është njëkohësisht dita për të riparuar demokracinë nga dëmi i procesit të paligjshëm që i është imponuar vendit tonë. Kjo është kutia e votimit për ta riparuar atë”, deklaroi zoti Imamoglu.
Kandidati i mazhorancës, 63-vjeçari Binali Yildirim, një ish-kryeministër i vendit dhe ministër i hershëm i transporteve në qeveritë Erdogan, rezultonte në disavantazh në disa prej anketimeve të zhvilluara. Ai megjithatë dha një mesazh paqtimi në ditën e rivotimeve:
“Mendoj se sot është dita të lëmë mënjanë hatërmbetjet dhe të përqendrohemi tek e ardhmja. Nëse kam bërë ndonjë gabim, ose nëse jam treguar i padrejtë me rivalët dhe banorët, me apo pa dashje, tani u kërkoj bekimin e tyre. Shpresoj që zgjedhjet t’i shërbejnë të mirës së vendit”, deklaroi Binali Yildirim, kandidati i partisë në pushtet AK.
Vetë Kryeministri Erdogan u shfaq në mbështetje të ish-kryeministrit të tij dhe në vijën e parë të një fushate elektorale për këto zgjedhje të pjesshme lokale që perceptohen si një referendum për politikat e tij dhe si një test për demokracinë e trazuar të Turqisë.
Edhe
Erdogani synon ta rimarrë Stambollin
“Do të ishte e dobishme të fillonim një konsolidim të (qeverisë) Ankarasë dhe të Stambollit (bashkisë). Mendoj se votuesit e Stambollit do të japin verdiktin e duhur”, deklaroi presidenti Erdogan.
Me një popullsi të regjistruar prej 10.56 milionë banorësh, Stambolli përfaqëson 1/5-ën e vendit me popullsi prej 82 milionë banorësh./VOA/
