Presidenti rus Vladimir Putin do të vizitojë Turqinë më 12 shkurt për të takuar homologun e tij Recep Tayyip Erdogan, duke shënuar udhëtimin e parë të një lideri rus në një aleat të NATO-s që nga pushtimi i Ukrainës nga Moska në shkurt të vitit 2022, shkruan Reuters.
Gama e udhëtimeve jashtë vendit të Putinit është kufizuar që nga marsi i vitit të kaluar, kur Gjykata Ndërkombëtare Penale (GJNP) lëshoi urdhërarrest kundër tij për deportimin e dyshuar të fëmijëve ukrainas në Rusi, që konsiderohet një krim lufte. Moska i hodhi poshtë akuzat dhe e quajti këtë veprim të egër, por ka thënë se në çdo rast ishte ligjërisht i pavlefshëm, sepse Rusia nuk është anëtare e GJNP-së.
Turqia gjithashtu nuk është pjesë e Statutit të Romës të GJNP-së, kështu që Putini mund të udhëtojë në Turqi pa frikë se do të arrestohet sipas urdhërarrestit.
Turqia, e cila ndan kufi detar me Ukrainën dhe Rusinë në Detin e Zi, kërkon të mbajë marrëdhënie të mira me të dy vendet. Ajo ka ofruar mbështetje ushtarake për Kievin dhe ka shprehur mbështetje për integritetin e saj territorial, por gjithashtu kundërshton sanksionet kundër Rusisë.
Ankaraja ka kërkuar të bindë Rusinë që të kthehet në marrëveshjen e grurit, e ndërmjetësuar nga Kombet e Bashkuara dhe Turqia për të siguruar eksporte të mbrojtura nga portet ukrainase, pasi Moska u tërhoq korrikun e kaluar pas një viti zbatim.
Erdogani ka thënë se alternativat ndaj marrëveshjes nuk mund të ofrojnë zgjidhje të qëndrueshme. Ndërsa Kievi ka thënë se bisedimet ishin duke u zhvilluar për të ringjallur marrëveshjen, Moska nuk ishte e interesuar ta rikthente.
Edhe
Putini del jashtë Rusisë për herë të parë që nga lëshimi i urdhërarrestit ndërkombëtar për të
Më herët të mërkurën, Turqia dhe Ukraina nënshkruan marrëveshje që lejon kompanitë turke të ndërtimit të marrin pjesë në rindërtimin e infrastrukturës ukrainase të dëmtuar në luftën me Rusinë.
Turqia ka lidhje të ngushta ekonomike me Rusinë, veçanërisht në turizëm, furnizime me gaz, drithëra dhe tregti të tjera bujqësore, gjë që i bën vendet perëndimore të shqetësohen. Megjithatë, Turqia e Rusia janë përplasur për konfliktet në Siri dhe Libi, ku mbështesin palët kundërshtare, si dhe tensionet midis Azerbajxhanit dhe Armenisë në Kaukazin e Jugut.
