Presidenti i Rusisë, Vladimir Putin, do ta presë të hënën në takim homologun e tij nga Kina, Xi Jinping, duke shpresuar për mbështetje kundër presionit perëndimor mbi luftën në Ukrainë, teksa pritet që Xi ta paraqesë Kinën si një paqebërëse globale që synon të ndërmjetësojë për t’i dhënë fund konfliktit, raportoi Reuters.
Xi do të jetë lideri i parë kombëtar që do t’i shtrëngojë dorën Putinit që kur Gjykata Ndërkombëtare Penale lëshoi një urdhër arresti për të të premten lidhur me depërtimin e fëmijëve ukrainas në Rusi.
Moska e kundërshton akuzën, ndërsa Pekini ka thënë se ajo pasqyron standarde të dyfishta.
Rusia po paraqet udhëtimin e Xi-së, i pari i tij që nga sigurimi i një mandati të tretë të paprecedentë këtë muaj, si dëshmi se ka një mik të fuqishëm të përgatitur për të qëndruar me të kundër Perëndimit që e akuzon se po përpiqet të izolojë dhe mposht Moskën.
"Ne mund të ndiejmë se peizazhi gjeopolitik në botën e jashtme po kalon ndryshime drastike", ka thënë Putini në një artikull në të përditshmen kineze “People's Daily” të botuar në faqen e internetit të Kremlinit.
Për Xi-në, vizita është një litar i ngushtë diplomatik.
Kina ka lëshuar një propozim prej 12 pikash për zgjidhjen e krizës në Ukrainë, por në të njëjtën kohë ka forcuar lidhjet me Moskën.
Ky vend ka hedhur poshtë vazhdimisht akuzat perëndimore se po planifikon të armatosë Rusinë, por thotë se dëshiron një partneritet më të ngushtë energjetik pas rritjes së importeve të qymyrit, gazit dhe naftës ruse pas pushtimit të gjithanshëm të Ukrainës nga Putin.
