Presidenti rus Vladimir Putin dhe Kryeministri indian Narendra Modi janë mes 20 liderëve botërorë që po marrin pjesë në një samit rajonal sigurie në Kinë.
Përpara mbajtjes së samitit vjetor të Organizatës së Bashkëpunimit të Shangait (SCO) në qytetin port të Tianjinit, Modi po zhvillon bisedime me presidentin kinez Xi Jinping. Kjo është vizita e parë e Modi-t në Kinë pas shtatë vjetësh.
Putin, një aleat i ngushtë i Kinës, mbërriti në Tianjin të dielën, ku u prit me tapet të kuq.
Samiti mbahet në një moment tensionesh të shtuara ndërkombëtare: Presidenti amerikan Donald Trump ka vendosur tarifa të larta ndaj mallrave indiane, si ndëshkim për vazhdimin e blerjes së naftës ruse nga India. Ndërkohë, Putin përballet me kërcënime të reja për sanksione, për shkak të luftës në vazhdim në Ukrainë.
Organizata SCO, e mbështetur nga Pekini, përbëhet nga 10 shtete anëtare – përfshirë Pakistanin dhe Iranin – si dhe 16 vende partnere në dialog apo me status vëzhguesi.
Megjithëse samiti është kryesisht simbolik, ai ofron mundësi që liderët të shprehin shqetësime të përbashkëta dhe interesa të përbashkëta – dhe këtë vit, takimi do të jetë i dominuar nga luftërat tregtare me SHBA-në.
Kina dhe India zotohen të jenë partnerë, jo rivalë
Photo: Associated Press
Udhëheqësit e Kinës dhe Indisë kanë thënë se besimi mes tyre po thellohet pas vitesh të tëra tensionesh që përfshijnë një mosmarrëveshje të gjatë kufitare.
Presidenti i Kinës, Xi Jinping dhe kryeministri indian, Narendra Modi janë takuar të dielën në margjinat e Organizatës së Bashkëpunimit të Shangait (SCO) në qytetin portual të Tianjin. Është hera e parë e Modit në Kinë në shtatë vjet.
Xi i ka thënë Modit se Kina dhe India duhet të jenë partnerë, jo rivalë, ndërsa Modi ka thënë se tani ekziston një "atmosferë paqeje dhe stabiliteti" midis tyre.
Presidenti Putin është gjithashtu në samit, ku marrin pjesë më shumë se 20 udhëheqës botërorë, por këtë vit është lënë në hije nga luftërat tregtare me SHBA-në.
Presidenti Trump ka vendosur tarifa të larta për mallrat indiane si ndëshkim për blerjen e vazhdueshme të naftës ruse nga Delhi, dhe Putini përballet me kërcënime për sanksione për luftën e tij të vazhdueshme ndaj Ukrainës.
Teksa marrëdhëniet SHBA-Indi përballen me situata gjithnjë e më të vështira, Modi po i afrohet Xi-së.
Të dy vendet jo vetëm që janë më të populluarat, por kanë edhe dy nga ekonomitë më të mëdha në botë.
Modi ka njoftuar se fluturimet midis Indisë dhe Kinës, të pezulluara që nga përplasjet vdekjeprurëse të trupave në kufirin e tyre të përbashkët në Himalaje në vitin 2020, do të rifillonin, pa dhënë një afat kohor.
Ndërkaq Xi ka thënë se "të dyja palët duhet t'i qasen dhe ta trajtojnë marrëdhënien tonë nga një lartësi strategjike dhe perspektivë afatgjatë" dhe se "është zgjedhja e duhur që të dyja palët të jenë miq".