Pothuajse një e treta e popullsisë në Rripin e Gazës po kalon ditë pa ngrënë fare, ka paralajmëruar Programi Botëror për Ushqim (WFP) i Kombeve të Bashkuara.
“Në Gaza, kequshqyerja po rritet me shpejtësi. Rreth 90 mijë gra dhe fëmijë kanë nevojë urgjente për trajtim”, thuhet në një deklaratë të WFP-së dhënë agjencisë franceze të lajmeve AFP.
Paralajmërimet për uri ekstreme në Gaza janë shtuar gjatë kësaj jave. Vetëm të premten, nëntë persona të tjerë kanë vdekur si pasojë e kequshqyerjes, sipas Ministrisë së Shëndetësisë të drejtuar nga Hamasi në këtë territor, duke e çuar numrin e përgjithshëm të viktimave nga uria në 122 që nga fillimi i luftës.
Izraeli, i cili kontrollon hyrjen e ndihmave në Gaza, mohon të ketë vendosur ndonjë kufizim për furnizimet dhe fajëson Hamasin për gjendjen e rënduar humanitare.
Një zyrtar izraelit i sigurisë ka thënë të premten se mund të lejohet hedhja ajrore e ndihmave në ditët në vijim – një metodë për të cilën organizatat humanitare kanë paralajmëruar më parë se është e paefektshme për të dërguar furnizime në mënyrë të qëndrueshme dhe të sigurt.
Ndërkohë që mediat lokale raportuan se Emiratet e Bashkuara Arabe dhe Jordania do të realizojnë këto hedhje, një zyrtar i lartë jordanez ka thënë se ushtria ende nuk ka marrë leje nga Izraeli për ta bërë një gjë të tillë.
Organizata e Kombeve të Bashkuara e ka cilësuar këtë veprim si një “shmangie e përgjegjësisë për mosveprim” nga ana e qeverisë izraelite.
Ky zhvillim vjen në një kohë me shqetësim në rritje ndërkombëtar për kushtet humanitare në Gaza. Të premten, Gjermania, Franca dhe Britania e Madhe i bënë thirrje Izraelit që “të heqë menjëherë kufizimet për hyrjen e ndihmave” në këtë territor të rrethuar.