Policia franceze po heton një sërë rrëmbimesh të investuesve të lidhur me kriptovaluta, pasi një burri 60-vjeçar iu këput një gisht nga sulmuesit që kërkuan që djali i tij - një milioner i kriptovalutave - të paguante para për lirimin, raporton “The Guardian”.
Në rrëmbimin e fundit të lidhur me kriptovaluta në Francë dhe Evropën Perëndimore, burri, që zotëronte kompani marketingu të kriptovalutave së bashku me djalin, u lirua nga një shtëpi në jug të Parisit të shtunën mbrëma. Ai ishte mbajtur mbi dy ditë.
Një nga gishtat e burrit ishte prerë dhe hetuesit thonë se mund të kishte pasur gjymtime tjera po të mos ishte shpëtuar.
Burri, i cili nuk është identifikuar publikisht, u rrëmbye mëngjesin e të enjtes rreth orës 10:30, në një rrugë në Paris. Katër burra me maska skijimi e detyruan të hipte në një furgon mallrash.
Ai u lirua nga policia në një bastisje rreth orës 21:00 të shtunën në një shtëpi 20 kilometra në jug të Parisit, në zonën Essonne. Pesë të dyshuar rreth të 20-ave u arrestuan në shtëpi.
“Viktima duket se është babai i një burri që e ka bërë pasurinë e tij me kriptovaluta. U kërkua një shpërblesë për lirimin e tij”, ka thënë prokurori i shtetit.
Gruaja e viktimës u tha hetuesve se burri dhe djali i saj i pasur, të dy zotëronin një firmë në Maltë për marketing të kriptovalutave dhe se kishin marrë kërcënime në të kaluarën.
“Le Parisien” raporton se sulmuesit kërkuan 5-7 milionë euro, por shuma s’u pagua.
Pesë të dyshuarit për rrëmbim, të moshave nga 20 deri 27 vjeç, po merren në pyetje nga policia.
Rrëmbimi ishte i fundit nga një sërë rrëmbimesh të figurave të kriptovalutave në Francë dhe në shtetet fqinje.
David Balland, bashkëthemelues i firmës së kriptovalutave “Ledger”, që vlerësohet në mbi 1 miliard dollarë, u kidnapua me partneren e tij më 21 janar në shtëpinë e tyre në Mereau, në Francën qendrore. Edhe atij iu pre një gisht.
Sulmuesit mbërritën në shtëpinë e Ballandit në orët e mëngjesit dhe morën atë dhe partneren e tij. Ballandi u dërgua në një shtëpi në Chateauroux, dhe iu pre një gisht.
Policia u kontaktua nga një partner i biznesit i Ballandit, të cilit i ishte dërguar një video e gishtit së bashku me një kërkesë për pagesë të një shpërblimi në kriptomonedha prej 10 milionë eurosh. Balland u lirua menjëherë pas një bastisje policore. Partnerja e tij u gjet e lidhur në bagazhin e një makine në një parking në Essonne në jug të Parisit mëngjesin e nesërm.
Nëntë të dyshuar janë në hetim penal për atë rast, përfshirë udhëheqësin e dyshuar – 26-vjeçar – që kishte dosje policore për një rrëmbim të mëhershëm,
Në dhjetor të vitit të kaluar, babai 56-vjeçar i një influencuesi të kriptovalutave me seli në Dubai, ishte shënjestra e një rrëmbimi të dyshuar në lindje të Francës. Sulmuesit mbërritën në shtëpinë e burrit, lidhën gruan dhe vajzën e tij dhe e detyruan atë të hipte në veturë.
Djali mori një kërkesë për shpërblim dhe menjëherë kontaktoi policinë. Dy gratë u liruan shpejt, ndërsa babai u zbulua 24 orë më vonë në bagazhin e një makine në Normandi. Ai kishte shenja të dhunës fizike dhe ishte spërkatur me benzinë.
Rrëmbime tjera u raportuan në Spanjë dhe Belgjikë në pesë muajt e fundit.
