Ministri pakistanez i Planifikimit ka thënë se vlerësimet e para tregojnë se përmbytjet shkatërruese që goditen vendin, kanë shkaktuar të paktën 10 miliardë dollarë dëme.
Komenti i tij vjen pasi një tjetër ministër i qeverisë tha se një e treta e kombit të Azisë Jugore është zhytur në ujë.
Pakistani të hënën mori ndihmë prej 1.1 miliardë dollarësh nga Fondi Monetar Ndërkombëtar, shkruan BBC-ja të martën.
Përmbytjet e mëdha të shkaktuara nga shirat historik kanë marë jetën e të paktën 1.136 njerëzve dhe kanë prekur më shumë se 15 për qind të popullsisë së vendit
Shirat e rrëmbyeshëm kanë përbirë gjithashtu rrugët, të mbjellat, shtëpitë, urat dhe infrastrukturën tjetër.
Edhe
Një e treta e Pakistanit nën ujë, 33 milionë njerëz kërkojnë ndihmë urgjente
“Unë mendoj se dëmi do të jetë i madh. Deri më tani, sipas vlerësimit paraprak, dëmi është më i madh se 10 miliardë dollarë”, i ka thënë agjencisë së lajmeve Reuters, ministri i Planifikimit i Pakistanit, Ahsan Iqbal.
Iqbal tha se vendi do të përballet me mungesa serioze ushqimore në javët dhe muajt e ardhshëm dhe beson se këto përmbytje janë më të këqijat që kanë goditur Pakistanin që nga viti 2010, ku kishin mbetur të vdekur më shumë se 2.000 njerëz.
Ai u bëri thirrje gjithashtu vendeve më të pasura që të ndihmojnë financiarisht Pakistanin, pasi tha se ishte viktimë e ndryshimeve klimatike, të cilat ishin shkaktuar nga “zhvillimi i papërgjegjshëm i botës së zhvilluar”.
Për ta adresuar mungesën e ushqimit, ministri i Financave, Miftah Ismail, tha se Pakistani mund ta konsiderojë importimin e perimeve nga India.
Edhe
Mbi dy milionë persona evakuohen nga përmbytjet vdekjeprurëse në Pakistan
Të hënën, ministrja për Ndryshimet Klimatike, Sherry Rehman, e përshkroi situatën si “katastrofë humanitare të shkaktuar nga klima”.
“Fjalë për fjalë, një e treta e Pakistanit është nën ujë tani, gjë që ka tejkaluar çdo kufi, çdo normë që kemi parë në të kaluarën”, tha Rehman për agjencinë e lajmeve AFP.
