Për herë të parë në botë, më shumë se 1 milion raste ditore me COVID-19

Numri i rasteve të reja pozitive me COVID-19 në mbarë botën ka kaluar shifrën prej 1 milion, për herë të parë që kur janë shënuar rastet e para me virus, dy vjet më parë.

Infektimet e reja në Shtetet e Bashkuara të Amerikës kanë arritur në nivelin më të lartë, të shkaktuar më së shumti nga numri i madh i rasteve me variantin më të ri, Omicron.

Australia po ashtu ka shënuar rekord rastesh të enjten, ndonëse ngushtoi përkufizimin e saj të kontakteve të ngushta të rasteve me koronavirus, dhe kërkesave të relaksuara për testet COVID-19, në një përpjekje për të lehtësuar presionin në vendet e testimit.

Ndërkohë, Organizata Botërore e Shëndetësisë paralajmëroi se variantet Omicron dhe Delta mund të prodhojnë një "cunam" të rasteve të COVID-19 që do të ushtrojë "presion të jashtëzakonshëm" në sistemet e kujdesit shëndetësor.

Në anën tjetër, zyrtari më i lartë shëndetësor i Izraelit njoftoi se ai ka miratuar një vaksinë të dytë përforcuese të COVID-19 për njerëzit me sistem imunitar të dobësuar, por një vendim përfundimtar për përdorim më të gjerë është ende në pritje.

Një spital izraelit administroi injeksionet e katërta tek një grup testues punonjësish shëndetësorë të hënën, në atë që e quajti studimin e parë madhor nëse një raund i dytë i përforcuesve do të ndihmojë në përballjen me variantin Omicron.