PE-ja miratoi një rezolutë kundër shtypjes politike ruse dhe vdekjes së Navalnyt

Parlamenti Evropian ka miratuar të enjten një rezolutë kundër shtypjes politike në Rusi dhe vdekjes së liderit të opozitës ruse, Alexei Navalny.

Rezoluta u miratua me 506 vota pro, nëntë kundër dhe 32 abstenime.

Ligjvënësit evropianë diskutuan për çështje të tilla si nevoja për veprim të BE-së në mbështetje të të burgosurve politikë dhe shoqërisë civile të shtypur në Rusi, si dhe nevojës për mbështetjen e BE-së për Ukrainën, dy vjet pas fillimit të luftës atje, raportoi AP.

E veja e Navalny, Yulia Navalnaya iu drejtua Parlamentit Evropian të mërkurën dhe iu lut bllokut 27-vendesh që t'i kundërvihen presidentit rus, Vladimir Putin.

Udhëheqësi më i njohur i opozitës ruse Alexei Navalny vdiq papritur në një koloni burgu në fillim të këtij muaji, ndërsa vuante një dënim 19-vjeçar për akuzat për ekstremizëm. Varrimi i Navalny është caktuar që të mbahet të premten.