Organizata e Kombeve të Bashkuara nuk e njeh pretendimin e Kremlinit se do ta vinte nën kontrollin rus centralin më të madh bërthamor në Evropë, atë të Zaporizhzhias, shkruan të enjten “New York Times”.
Drejtori i përgjithshëm i Agjencisë Ndërkombëtare të Energjisë Atomike, Rafael Mariano Grossi, ka thënë të enjten se centrali bërthamor ende vazhdon të njihet si objekt ukrainas, pasi statuti i OKB-së nuk njeh aneksime të paligjshme.
"Kjo është një çështje që ka të bëjë me të drejtën ndërkombëtare," tha ai në një konferencë shtypi.
Ai shtoi se qëllimi kryesor i IAEA-s është të parandalojë një aksident bërthamor, për të cilin ai paralajmëroi se vazhdon të jetë ende i mundshëm të ndodhë.
Grossi njoftoi se IAEA do të vazhdojë të mbajë inspektorët e saj në objekt, siç ka bërë që nga shtatori. Ai theksoi se në javët e ardhshme numri i inspektorëve do të rritet nga dy në katër.
Javën e kaluar Rusia aneksoi ilegalisht katër rajone të Ukrainës, duke përfshirë Zaporizhzhian ku është objekti.
Të mërkurën, Rusia tha se do të merrte kontrollin operacional të objektit, i cili u kap nga forcat ruse në mars, por ende drejtohet nga inxhinierë ukrainas.
Zyrtarët ukrainas kanë dënuar tentativën për marrjen e objektit dhe thanë se do të vazhdojnë menaxhimin e tij, megjithëse nuk dihet se si mund të zbatohej kjo strategji derisa Rusia e ka në kontroll.
