NYT: Departamenti amerikan po përgatitet t’i rikthejë diplomatët në Lindjen e Mesme

Departamenti Amerikan i Shtetit po përgatitet të rikthejë diplomatët në ambasadat në Lindjen e Mesme që janë evakuuar para dhe gjatë luftës me Iranin, ka raportuar të martën New York Times, duke cituar një dokument të brendshëm të Departamentit të Shtetit.

Sipas raportimit, rikthimi i oficerëve të Shërbimit të Jashtëm dhe reduktimi i masave emergjente në misionet amerikane në rajon mund të fillojë që këtë javë.

Sipas raportimit, ambasadat ku parashikohet të rikthehet një numër më i madh i personelit përfshijnë ato në Izrael, Liban, Arabinë Saudite, Katar, Jordani, Oman, Irak dhe Kuvajt.

Në një deklaratë të cituar nga New York Times, Departamenti i Shtetit ka thënë se vazhdimisht rishikon gjendjen e sigurisë në misionet amerikane diplomatike në të gjithë botën.

“Bazuar në vlerësimin tonë më të fundit, ne po përshtatim nivelin e personelit në disa poste në Lindjen e Mesme, për të garantuar se mund të vazhdojmë të çojmë përpara objektivat e politikës së jashtme amerikane, duke mbrojtur njëkohësisht sigurinë dhe mirëqenien e personelit tonë”, ka thënë departamenti.

Sipas dokumentit, diplomatët e parë që do të rikthehen do të caktohen në Ambasadën e SHBA-së në Liban, megjithëse niveli i personelit atje do të mbetet nën kapacitetin e plotë. Në fund, personeli do të rikthehet plotësisht në ambasadat amerikane në Izrael, Jordani dhe Oman, thuhet në raport.

Edhe Botë 19 maj 2026 Shërbyesi kishtar që refuzoi të heshtte për ngacmimet seksuale

Postet diplomatike në Emiratet e Bashkuara Arabe, Arabinë Saudite, Katar dhe Liban fillimisht do të kufizohen në 85% të kapacitetit të personelit, ndërsa misionet në Irak, Kuvajt dhe Bahrein do të kufizohen në 75%, sipas dokumentit.

Reduktimi i personelit ka nisur në shkurt, kur Uashingtoni autorizoi largimin vullnetar të personelit joemergjent dhe familjarëve nga Izraeli, për shkak të tensioneve me Iranin.