Macroni thërret liderët evropianë në takim urgjent për t’i adresuar sfidat me Trumpin

Presidenti francez, Emmanuel Macron, i ka ftuar liderët evropianë për një takim urgjent në Paris të hënën, sipas njoftimit të bërë nga ministri i Punëve të Jashtme të Polonisë, Radosław Sikorski, në margjinat e Konferencës së Sigurisë në Munih të shtunën, shkruan Politico.

“Jam shumë i kënaqur që presidenti Macron ka thirrur liderët tanë në Paris”, ka thënë Sikorski, duke shtuar se ka pritshmëri që liderët evropianë do të diskutojnë “në mënyrë shumë serioze” për sfidat në marrëdhëniet e tyre me presidentin amerikan Donald Trump.

Që takimi do të mbahet të hënën, është konfirmuar edhe nga dy zyrtarë evropianë.

Nuk ishte menjëherë e qartë nëse takimi do të përfshinte të gjithë liderët e Bashkimit Evropian, apo vetëm një grup më të vogël shtetesh, dhe nëse liderë të tjerë evropianë si kryeministri i Mbretërisë së Bashkuar, Keir Starmer do të ftoheshin gjithashtu.