Presidenti rus Vladimir Putin ka thënë se Ukraina ka shumë gjasa të fillojë bisedimet e paqes vetëm kur t’i mbarojnë burimet njerëzore dhe ato ushtarake.
Putin, duke folur në një forum në qytetin port rus të Paqësorit, Vladivostok, ka thënë se kundërofensiva e Ukrainës kundër forcave ruse deri më tani kishte dështuar dhe se ushtria ukrainase kishte pësuar humbje të mëdha.
“Kam përshtypjen se ata duan të kafshojnë sa më shumë që të munden dhe pastaj, kur burimet e tyre janë afër zeros, të ndërprenë armiqësinë dhe të fillojnë negociatat në mënyrë që të kthejnë burimet e tyre dhe të kthejnë aftësinë e tyre luftarake”, ka thënë Putin.
Sipas tij, shumë ndërmjetës e kanë pyetur nëse Rusia është gati të ndalojë luftimet, duke thënë se Rusia vështirë se mund të ndalojë së luftuari kur përballet me një kundërofensivë ukrainase.
“Që të ketë ndonjë shans për bisedime, Ukraina së pari duhet të heqë ndalimin e vetë-imponuar ligjor mbi bisedimet e paqes dhe të shpjegojë se çfarë dëshiron. Pastaj do të shohim”, ka thënë Putin.
Edhe
Kremlini përsërit deklaratën e Putinit se lufta në Ukrainë është gati të mbarojë
Rusia kontrollon rreth 18 për qind të territorit të Ukrainës, duke përfshirë Krimenë, të cilën e aneksoi në vitin 2014, dhe pjesë të Ukrainës lindore dhe jugore që mori nën kontroll në vitin 2022.
Ukraina ka luftuar për disa muaj në përpjekje për të rimarrë një pjesë të atij territori dhe ka rimarrë disa fshatra, por ende nuk ka bërë përparim të rëndësishëm territorial kundër linjave të fortifikuara ruse.
