Kremlini thotë se vazhdimi i bisedimeve me Ukrainën është në interesin e tij

Kremlini ka thënë të hënën se është në interesin e vetë Rusisë të vazhdojë bisedimet e paqes me Ukrainën, dhe se preferenca e Moskës është ende që të arrijë një zgjidhje diplomatike për t'i dhënë fund luftimeve.

Bisedimet e paqes nuk kanë sjellë përparim në javët e fundit për shkak të këmbënguljes së Rusisë që Ukraina të dorëzojë pjesën e mbetur të rajonit të saj lindor të Donbasit, të cilën Moska nuk e kontrollon, një ide që presidenti ukrainas, Volodymyr Zelensky e ka hedhur poshtë vazhdimisht.

Bloomberg Neës ka raportuar të shtunën, duke cituar njerëz të njohur me çështjen, se zyrtarët rusë gjithnjë e më shumë po shohin pak arsye për të vazhduar bisedimet e udhëhequra nga SHBA-ja, përveç nëse Kievi sinjalizonte se ishte i përgatitur të hiqte dorë nga territori.

Por zëdhënësi i Kremlinit, Dmitry Peskov, ka thënë të hënën se Rusia mbetet e përkushtuar ndaj bisedimeve megjithatë, dhe se qasja e saj ishte e pandryshuar.

"Ne kemi interesat tona që duhet t'i mbrojmë dhe është në interesin tonë të vazhdojmë këto negociata.

Ne sigurisht mbetemi të hapur për këto negociata", ka thënë Peskov, duke shtuar se "një zgjidhje politike dhe diplomatike" ishte mënyra e preferuar e Moskës për t'i dhënë fund luftimeve.

I pyetur nëse sulmet e SHBA-së ndaj Iranit do të ndikonin në procesin e paqes për Ukrainën, Peskov ka deklaruar se Rusia vazhdon të vlerësojë përpjekjet e ndërmjetësimit të SHBA-së, por ka shtuar se Moska i beson vetëm vetes "para së gjithash" dhe do të udhëhiqet nga interesat e veta.