Kina dhe Mbretëria e Bashkuar kanë arritur marrëveshje të re pasi kanë rifilluar bisedimet për financa dhe ekonomi, të shtunën gjatë një vizite nga udhëheqësja e Thesarit të Britanisë në Pekin, pas gjashtë vjetësh mungesë takimesh, raporton Associated Press.
Rachel Reeves ka udhëtuar për Pekin e shoqëruar nga një delegacion i biznesmenëve britanikë dhe zyrtarëve të financave.
Ajo u takua me liderët kinezë duke përfshirë zëvendëskryeministrin He Lifeng dhe zëvendëspresidentin Han Zheng.
Të dyja palët rifilluan dialogun ekonomik dhe financiar që nga viti 2019 kur u suspenduan si pasojë e pandemisë COVID-19 dhe përkeqësimit të marrëdhënieve.
Londra shpreson se rifillimi i bisedimeve do të ndihmojë të largohen barrierat që bizneset britanike hasin gjatë zgjerimit të eksportit në Kinë.
Edhe
Starmer niset drejt Kinës teksa aleancat perëndimore përballen me tendosje
Reeves ka thënë se rifillimi i dialogut do t’i shtojë ekonomisë së Britanisë rreth 730 milionë dollarë gjatë pesë vjetëve të ardhshme.
Marrëdhëniet mes Kinës dhe Britanisë janë përkeqësuar si pasojë e dyshimeve të dyanshme për spiunazh. Kina mbështet Rusinë në luftën ndaj Ukrainës si dhe disa shkelje të të drejtave të njeriut në Hong Kong, ish-koloni britanike.
Vizita e Reevesit vjen pasi sekretari i Jashtëm David Lammy udhëtoi në Kinë në tetor dhe kryeministri Keir Starmer u takua me presidentin kinez Xi Jinping në prapavijat e samitit të G20-s në Brazil në nëntor.
Është e gjitha një nismë e Starmerit, i zgjedhur si kryeministër në qershor, për të fuqizuar lidhjet ekonomike dhe politike me Kinën, partneri i katërt tregtar i Britanisë.
Liderët politikë britanikë dhe shefat e inteligjencës kanë paralajmëruar vazhdimisht se Kina përbën kërcënime për sigurinë.
Edhe
Putini mbërrin në Kinë për bisedime me Xi-në
Përgatiti: Shkëlzen Dema
