Kina dhe Japonia të shqetësuara me shpërthimin e ri të rasteve me COVID-19

Shpërthimi i rasteve të para të infektimit me koronavirus në qytetin kinez Nanzhing është përhapur në pesë krahina të tjera dhe në Pekin.

Së paku 200 persona janë infektuar, pasi rasti i parë u konfirmua më 20 korrik në aeroportin e qytetit.

Të gjitha fluturimet nga aeroporti i qytetit janë anuluar deri më 11 gusht. Zyrtarët kanë filluar testimet në masë, në kohën kur kanë nisur kritikat për dështimin e autoriteteve. 9 milionë banorët e qytetit – përfshirë edhe ata që e kanë vizituar, do të testohen, kanë bërë të ditur mediat kineze.

Zyrtarët kanë fajësuar variantin Delta për ngritjen e madhe të rasteve në Kinë.

Ndërkaq situatë alarmante vazhdon të mbizotërojë në Japoni. Shteti japonez ka vazhduar gjendjen e emergjencës në katër zona të saja, pas shpërthimit të rasteve në Tokio, ku po zhvillohen Lojërat Verore Olimpike.

Qeveria japoneze ka bërë të ditur se gjendja e emergjencës do të vazhdojë deri në fund të muajit gusht. Kjo pasi që kryeqyteti Tokio ka raportuar për numër rekord rastesh për të tretën ditë radhazi.