Kina akuzon SHBA-në për “standarde të dyfishta” shkaku i kërcënimit me tarifa

Kërcënimi i fundit i presidentit amerikan, Donald Trump për të vendosur një tarifë shtesë prej 100% ndaj mallrave kineze, sipas Qeverisë se Kinës është “shembull tipik i standardeve të dyfishta të SHBA-së”. 

Një zëdhënës i Ministrisë së Tregtisë së Kinës ka thënë se Kina mund të marrë kundërmasa nëse presidenti amerikan e realizon këtë kërcënim, duke theksuar se nuk ka frikë nga një luftë tregtare, raporton BBC. 

Të premten, Trumpi reagoi kundër vendimit të Kinës për t’i ashpërsuar rregullat e saj për eksportin e elementëve të rrallë, duke e akuzuar se po bëhet shumë armiqësore.

Ai gjithashtu kërcënoi se mund të tërhiqet nga një takim i planifikuar me presidentin kinez Xi Jinping që pritet të ndodhë më vonë këtë muaj.

Fjalët e presidentit amerikan rikthyen frikën për një luftë tregtare mes SHBA-së dhe Kinës.

Në muajin maj, të dy vendet kishin rënë dakord të hiqnin tarifat e larta mbi mallrat e njëra-tjetrës, gjë që kishte sjellë shpresë për përmirësim të raporteve tregtare mes tyre.

Megjithatë, situata aktuale e ka përkeqësuar këtë. Aktualisht, mallrat kineze që hyjnë në SHBA përballen me një tarifë shtesë prej 30%, ndërsa mallrat amerikane që hyjnë në Kinë përballen me një tarifë prej 10%.

Deklaratat e fundit nga Kina - të publikuara nga Ministria e Tregtisë në formë përgjigjesh me shkrim për gazetarët - përdorin një gjuhë të ngjashme me atë të konfliktit tregtar të mëparshëm.

Kina kritikoi kufizimet amerikane për eksportin e çipave dhe gjysmëpërçuesve, dhe mbrojti vendimin e saj për kontrollin e eksporteve të elementëve të rrallë, duke i quajtur si “masa normale” për të mbrojtur sigurinë kombëtare dhe atë të vendeve të tjera.

Zëdhënësi ka theksuar se SHBA-ja për një kohë të gjatë ka “abuzuar me konceptin e sigurisë kombëtare, ka përdorur masa të tepruara të kontrollit të eksporteve” dhe ka “zbatuar praktika diskriminuese ndaj Kinës”.

“Përdorimi i kërcënimeve me tarifa nuk është mënyra e duhur për të bashkëpunuar me Kinën”,  ka deklaruar zëdhënësi.

“Qëndrimi i Kinës për një luftë tregtare ka qenë gjithmonë i njëjtë: ne nuk e duam atë, por nuk kemi frikë”.

Javën e kaluar, Kina ka njoftuar se do të forcojë kontrollin e eksporteve të elementëve të rrallë dhe materialeve të tjera të rëndësishme për teknologjinë e avancuar.

Kjo u konsiderua si një lëvizje e fortë, pasi Kina përpunon rreth 90% të elementëve të rrallë në botë, që përdoren në produkte si panelet diellore dhe telefonët inteligjentë.