Lideri veri-korean Kim Jong-un ka thënë se është i gatshëm ta rivendosë linjën e komunikimit me Korenë e Jugut, në një ofertë të mundshme pajtimi, raporton BBC.
Ai po ashtu ka akuzuar SHBA-në se ka propozuar bisedime pa ndryshuar “politikën e saj armiqësore” karshi Koresë së Veriut.
Pyongyang ndërpreu linjat e komunikimit në gusht të këtij viti, në shenjë proteste kundër stërvitjeve të përbashkëta ushtarake të Koresë së Jugut dhe SHBA-së.
Komentet e Kim Jong-Unit erdhën gjatë sesionit vjetor të Parlamentit të Pyongyangut.
“SHBA-ja po promovon ‘angazhim diplomatik’, por nuk është asgjë më tepër sesa një tentim për të mashtruar komunitetin ndërkombëtar dhe për të fshehur veprimet e saj armiqësore dhe vazhdimin e politikave të saj armiqësore të ndjekura nga administratat e njëpasnjëshme amerikane”, thuhet në një raport të agjencisë së lajmeve KCNA.
Sipas raportimit të KCNA-së, Kim Jong-un ka shprehur synimin që linjat Veri – Jug që ishin ndërprerë për shkak të përkeqësimit të marrëdhënieve, të rivendosen në fillim të tetorit.
“Por, varet nga qasja e autoriteteve jug-koreane nëse duan që të rikthehen marrëdhëniet ndër-koreane apo duan të vazhdojnë të mbajnë gjendjen aktuale të përkeqësimit”, tha Kim.
