Në Kombet e Bashkuara, gjegjësisht në Këshillin e Sigurimit, do të mbahet takimi i cili pritet të fokusohet kryesisht në situatën e krijuar në Lindjen e Mesme, përfshirë krizën humanitare në Rripin e Gazës dhe ndalimin e flotiljes që synon të dërgojë ndihma.
Përmes një deklarate, Ministria e Jashtme izraelite, thotë se nuk do të lejojnë flotijen që po transporton ndihma drejt Gazës, duke akuzuar Flotiljen Global Sumud se ka për qëllim t’i shërbejë Hamasit.
“Nëse dëshira e vërtetë e pjesëmarrësve në flotilje është të dërgojnë ndihmë humanitare dhe jo t’i shërbejnë Hamasit, Izraeli i bën thirrje anijeve të ankorohen në portin e Ashkelonit dhe ta shkarkojnë ndihmën aty, prej nga do të dërgohet menjëherë në Gaza në mënyrë të koordinuar,” thuhet në një deklaratë të Ministrisë së Jashtme izraelite.
Organizatorët e flotiljes e kanë mohuar një gjë të tillë dhe kanë konfirmuar se aktualisht janë 51 anije të Flotiljes Globale të Lirisë që po udhëtojnë drejt Gazës.
E ndërkohë, Danny Danon përmes një postimi në platformën X, konfirmon se delegacioni i Izraelit nuk do të marrë pjesë as në bisedimet e nesërme, një ditë që do të dominohet nga diskutimet për situatën në Lindjen e Mesme. Ai thotë se Izraeli kishte kërkuar që seanca të zhvendosej, pasi ajo bie në Rosh Hashanah, një ditë e shenjtë që shënon Vitin e Ri Hebraik.
“Pavarësisht njoftimit tonë paraprak që seanca bie në Rosh Hashanah, Këshilli zgjodhi të mbajë debatin pikërisht në këtë ditë. Një diskutim i njëanshëm i mbajtur në një festë hebraike është edhe një dëshmi më shumë e hipokrizisë së OKB-së.”
Muajin e kaluar, një trup i mbështetur nga OKB konfirmoi se në Gaza kishte uri ekstreme, dhe shefi i ndihmave humanitare të OKB-së deklaroi se kjo ishte rezultat i drejtpërdrejtë i pengesave nga Izraeli për hyrjen e ndihmave në Gaza.
Ky raport u cilësua si një gënjeshtër nga Izraeli.