Izraeli e pranon për herë të parë rolin në shpërthimin e pejxherëve të Hezbollahut

Izraeli ka konfirmuar për herë të parë se qëndronte pas operacionit të shtatorit për të shpërthyer qindra pejxherë të përdorur nga Hezbollahu në Liban.

Mediat izraelite raportuan të dielën se kryeministri Benjamin Netanyahu i tha kabinetit të tij se “Operacioni i zhurmës dhe eliminimi i (udhëheqësit të Hezbollahut, Hassan) Nasrallah u nis megjithë kundërshtimin e zyrtarëve të lartë në institucionin e sigurisë”.

Një zyrtar izraelit i konfirmoi këto komente për CNN-in, duke shënuar kështu herën e parë që Izraeli e pranon rolin e tij.

Vendimi i qeverisë për të informuar mediat izraelite mbi komentet e Netanyahut, dhe si rrjedhojë, të konfirmojë se Izraeli qëndron pas operacionit duket të jetë një kapitull tjetër në makinacionet e brendshme politike që kanë dominuar Izraelin javët e fundit.

Mediat izraelite e interpretuan shprehjen si kritikë të nënkuptuar ndaj udhëheqjes ushtarake dhe inteligjencës izraelite, si dhe ndaj ministrit të atëhershëm të Mbrojtjes Yoav Gallant, të cilin Netanyahu e shkarkoi të martën.

Më 17 shtator, mijëra shpërthime goditën anëtarët e Hezbollahut, duke synuar pejxherët e tyre dhe radiolidhjet një ditë më vonë. Shpërthimet vranë të paktën 37 njerëz, duke përfshirë disa fëmijë, dhe plagosën rreth 3,000, shumë prej tyre kalimtarë civilë, sipas autoriteteve shëndetësore libaneze.