Irani ka vendosur sanksione kundër më shumë se 30 individëve dhe subjekteve evropiane lidhur me protestat mbarëkombëtare brenda këtij vendi, raportoi të enjten “Euronews”.
Ky veprim është një kundërpërgjigje ndaj sanksioneve të fundit evropiane kundër zyrtarëve iranianë të lidhura me shtypjen e protestave mbarëkombëtare.
Iranianët kanë protestuar kundër regjimit që nga vdekja e 22-vjeçares Mahsa Amini, e cila u arrestua nga policia e moralit për shkeljen e kodit të rreptë islamik të Iranit shtatorin e kaluar.
Lista e të sanksionuarve përfshin individë të tillë si prokurori i përgjithshëm i Britanisë dhe shefi i shtabit të ushtrisë.
Masat do të ndalojnë udhëtimin në Iran dhe do të lejojnë autoritetet të bllokojnë llogaritë bankare dhe të konfiskojnë pronat në Iran.
Disa parlamentarë evropianë dhe zyrtarë ushtarakë u futën gjithashtu në listën e zezë.
Ndërkohë, Irani pretendon se sanksionet e fundit të BE-së shkelin kartën e Organizatës së Kombeve të Bashkuara.
