Rusia po vazhdon të bëjë përparime në Bakhmut, megjithatë ka edhe shumë viktima në këtë proces, ka njoftuar Instituti amerikan për Studimin e Luftës, në përditësimin e tij të fundit, raportoi të martën “Euronews”.
Sipas këtij instituti, pamjet gjeografike të bëra publike më 9 dhe 10 prill tregojnë se forcat ruse bënë përparime margjinale në perëndim të Bakhmutit dhe në jugperëndim të qytetit.
Komandanti i Forcave Tokësore të Ukrainës, gjeneral kolonel OIeksandr Syrskyi ka akuzuar trupat ruse për përdorimin e taktikave të “tokës së djegur” në këtë vend.
Ai gjithashtu ka deklaruar se forcat ukrainase i kanë lodhur forcat e Wagnerit aq shumë sa komanda ushtarake ruse është dashur të dërgojë forcat speciale dhe elementë të forcave ajrore ruse në Bakhmut.
Ministria e Mbrojtjes e Mbretërisë së Bashkuar ka thënë se mediat ruse raportuan transferimin e sistemeve të raketave termobarike me shumë lëshime te forcat ajrore ruse.
Transferimi ka të ngjarë të tregojë një rol të ardhshëm për këta elementë (forcat ajrore) në operacionet sulmuese në Ukrainë.
Kreu nga Rusia i rajonit të Donetskut të Ukrainës tha se forcat ruse kontrollonin më shumë se 75% të qytetit të rrethuar të Bakhmutit.