India hap disa biznese, pas rënies së numrit të të infektuarve

Bizneset në dy qytetet më të mëdha të Indisë janë rihapur të hënën, si pjesë e zbutjes graduale të izolimit në vend, pas rënies së shkallës ditore të infektimeve me koronavirus.

Kryeqyteti indian ka lejuar hapjen e bizneseve dhe dyqaneve me orë të kufizuara veprimi, ndërsa metroja e qytetit është vendosur që t’i vazhdojë operacionet me gjysmën e kapacitetit.

Autoritetet e qytetit kanë lejuar javën e shkuar vazhdimin e disa aktiviteteve në fushën e ndërtimit dhe prodhimit. Masat e ashpra të izolimit ishin zbatuar që nga prilli, kur kishte filluar vala e dytë shkatërrimtare e infektimeve që ka zgjatur deri në muajin maj. Me gjithë lehtësimin e masave, disa ekspertë shëndetësorë kanë shprehur drojën se dalja nga izolimi po bëhet tepër herët. Kjo ngase ekzistojnë shqetësimet se virusi ende po përhapet i pakontrolluar nëpër fshatrat indiane, ku testimet dhe përkujdesja shëndetësore janë të kufizuara.