Secila palë në një luftë minimizon humbjet e saj. Në shkurt, shërbimet e inteligjencës britanike vlerësuan se ishin vrarë 40 mijë deri në 60 mijë trupa. Ministria e Mbrojtjes e Ukrainës vlerëson se ka më shumë se 200 mijë viktima ruse - por këtu përfshihen edhe të plagosurit. Të gjitha këto shifra e zbehin pretendimin rus prej rreth 6 mijë të vrarësh
Rusia ka histori të fshehtësisë së jashtëzakonshme mbi humbjet e saj gjatë luftës. Kur ajo pushtoi Ukrainën, BBC-ja dhe partnerët e saj filluan të numëronin dhe verifikonin sa më shumë viktima që ishte e mundur.
BBC-ja identifikoi më shumë se 25 mijë individë me emra - njerëz që dihet se kanë vdekur - duke vendosur një minimum për humbjet totale të Rusisë. Disa prej tyre janë paraqitur këtu.
Numërimi ofron prova të forta të ndikimit të luftës në forcat ruse. Por u ka dhënë përgjigje edhe familjeve që nuk dinin asgjë për fatin e më të dashurve të tyre.
Disa as nuk e dinin se çfarë kishte ndodhur me familjarët e tyre derisa BBC-ja filloi hetimet.
Përralla e dy rekrutëve
Edhe
Inteligjenca britanike thotë se gati 500 mijë ushtarë rusë janë vrarë në luftën në Ukrainë
Rreshteri Nikita Loburets, drejtues skuadre në forcat speciale ruse, vdiq më 20 maj të vitit të kaluar në një fshat në Ukrainën lindore. Ai ishte 21 vjeç.
Gati një vit më vonë, të afërmit e Alexander Zubkovit mësuan që ai kishte vdekur gjatë luftimeve në Bakhmut. Në moshën 34-vjeçare, teksa vuante një dënim prej nëntë vjetësh burgim për vepra të lidhura me lëndë narkotike, ai ishte bashkuar me grupin mercenar Wagner me shpresën për të fituar lirinë.
Këta janë vetëm dy nga 25 mijë luftëtarët e vdekur që janë identifikuar nga BBC-ja, organizata e pavarur e medias ruse, Mediazona, dhe një ekip vullnetarësh, duke përdorur informacione nga raportet zyrtare, gazetat, mediat sociale dhe memorialët e varret e reja.
BBC-ja nuk mund të tregojë historitë e të gjitha këtyre mijëra vdekjeve, por të dhënat e mbledhura zbuluan fytyrën e ushtrisë ruse. Është një forcë luftarake që është gjithnjë e më e vjetër dhe më pak e stërvitur derisa numri i vdekjeve rritet.
Kur filloi lufta, luftëtari tipik rus, vdekja e të cilit u regjistrua gjatë numërimit të BBC-së, ishte rreth 21 vjeç dhe një ushtar profesionist i rangut të ulët - vetëm rreshter Nikita Loburets.
Sipas një rrëfimi nga babai i tij, Konstantin, Loburetsi kishte dashur të bëhej parashutist edhe para se të linte shkollën në Bryansk, një qytet rreth 100 km larg nga kufiri me Ukrainën. Ai filloi të studionte artet marciale dhe mësoi fluturimin me parashutë para diplomimit.
Përfundimisht, ai fitoi një vend në Shkollën e Lartë Ajrore Elitare, Ryazan, një akademi trajnimi për parashutistët rusë, përpara se të bashkohej me brigadën e forcave speciale të GRU-së, inteligjenca ushtarake e Rusisë.
Gati tre muaj pas luftës, rreshteri Loburets dhe një njësi e vogël rusësh u zunë pritë në një fshat në veri të Kharkivit dhe ai u vra, tha babai i tij.
Ai u varros në "Rrugicën e Heronjve" në varrezat e qytetit të tij dhe u nderua pas vdekjes me Urdhrin e Guximit. Kishte mijëra histori si të tijat në muajt e parë të luftës. Por, një vit më vonë, ato janë më pak të zakonshme.
Muajt e fundit, ushtari tipik rus i vrarë në Ukrainë është një i dënuar 34-vjeçar i rekrutuar nga burgu. Ashtu si Alexander Zubkov.
Zubkovi - të burgosurit që luftojnë në njësitë Wagner nuk kanë gradë ushtarake - ka lindur në Severodvinsk, një qytet në Detin e Bardhë në bregun veriperëndimor të Rusisë dhe një kantier detar i madh për marinën ruse.
Në vitin 2014, të dhënat e gjykatës tregojnë se ai ishte i papunë me një fëmijë kur u akuzua për vrasje dhe u dënua me tetë vjet e gjashtë muaj burgim.
I liruar me kusht në vitin 2020, ai u rikthye në gjykatë me akuzat për lëndë narkotike një vit më vonë - pasi ai dhe një bashkëpunëtor u kapën me 600 gramë stimulues të paligjshëm a-PVP.
Gjykata e dënoi atë me nëntë vjet të tjerë burgim, duke vënë në dukje se ai ishte i divorcuar, kishte një fëmijë të vogël dhe një motër me aftësi të kufizuara, për të cilët ai kujdesej.
Kur grupi Wagner filloi të rekrutonte të burgosurit, në nëntor të vitit të kaluar Zubkovi u bashkua me premtimin e pagës për shërbim prej 1.250 dollarësh në muaj. Nëse përfundonte gjashtë muaj shërbim, mund të lirohej tërësisht.
Por Zubkovi vdiq pas pesë muajsh, gjatë luftës së Wagnerit për të pushtuar qytetin lindor të Ukrainës, Bakhmut - beteja më e përgjakshme e luftës deri më tani. Ai u varros në qytetin e tij të lindjes më 28 prill.
Përdorimi i të burgosurve
Zubkovi dhe njerëz si ai po përdoren pothuajse si "trupa zëvendësues", thotë Jack Watling, ekspert në luftën tokësore në Institutin Mbretëror të Shërbimeve të Bashkuara (Rusi), një institut kërkimor për mbrojtjen.
Të burgosurit, në listën e të vdekurve variojnë nga hajdutët deri te drejtuesit e bandave kriminale.
Së bashku me civilët e mobilizuar, disa prej të cilëve janë kapur nga rruga ose në qendrat tregtare, ata janë urdhëruar të luftojnë vazhdimisht me forcat ukrainase, për t'i rraskapitur dhe ekspozuar pozicionet e tyre ndaj artilerisë.
“Ata i dërgojnë përpara me shpresën se do të vriten”, thotë Watling. "Dhe kështu, ushtria ruse po përdor këto trupa në një shkallë të konsiderueshme".
Ky ndryshim në taktikë mund të shihet në listat e viktimave.
Rusia humbi një numër të madh ushtarësh profesionistë në tre muajt e parë të luftës.
Por në tre muajt e fundit, ushtarët joprofesionistë po vdesin në një numër shumë më të madh.
Dr Watling thotë se Rusia po mbron qëllimisht profesionistët e saj të mbetur, duke i përdorur ata për sulme me snajper, dhe vetëm për sulme të rralla kur kushtet janë të përshtatshme.
Ekspertiza është më e vështirë tani. BBC-ja ka konfirmuar vdekjen e më shumë se 2.100 oficerëve ushtarakë rusë – ndoshta sepse Rusia mbështetet më shumë tek oficerët e rinj për udhëheqjen luftarake sesa vendet perëndimore, duke i vënë ata në rrezik. Të paktën 242 mbanin gradën e nënkolonelit ose gradë edhe më të lartë.
Të paktën 159 pilotë luftarakë janë vrarë gjithashtu, sipas numërimit. Këto humbje nuk mund të zëvendësohen në një shkallë praktike kohore: duhen të paktën shtatë vjet dhe miliona dollarë për t'i trajnuar trupat e reja.
Edhe
Rusia ofron para, liron të burgosur dhe josh të huaj për t’i plotësuar trupat e veta në Ukrainë
Këto humbje kanë detyruar veteranët të dalin në pension, ashtu si gjeneralmajori Kanamat Botashev.
Karriera e tij ushtarake u ndërpre në vitin 2012 kur ai mori hua një avion luftarak Su-27 pa leje dhe e rrëzoi atë. Në maj të vitit të kaluar, në moshën 63-vjeçare, ai po pilotonte një avion sulmi tokësor Su-25, kur u rrëzua mbi Luhansk në Ukrainën lindore.
Ai nuk ishte personi më i moshuar në listën e të vdekurve.
Llogaritja e besueshme
Ky numërim filloi, sepse stafi rus i BBC-së e dinte se nëse jo tani, më nuk do të kishte kurrë një regjistrim të besueshëm të vdekjeve. Secila palë në një luftë minimizon humbjet e saj. Por Rusia ka një histori të fshehjes së humbjeve të saj gjatë luftës përtej asaj që është e nevojshme për fshehtësinë ushtarake ose moralin e kombit.
Duke punuar me Mediazonan dhe anëtarët e publikut rus që dërgonin të dhëna, BBC-ja grumbulloi dhe verifikoi vdekjet e përmendura nga zyrtarët lokalë, në raportet e medias ose nga të afërmit në mediat sociale.
Ata monitoruan memorialët e luftës në të gjithë vendin për emra të rinj dhe vullnetarët fotografuan varret e reja, duke vendosur një emër dhe një identitet për çdo vdekje të konfirmuar.
BBC-ja kontaktoi qeverinë ruse për koment, por ajo nuk është përgjigjur.
Jo të gjitha vdekjet e Rusisë janë regjistruar nga numërimi ynë. Vullnetarët nuk mund të mbulojnë të gjithë hapësirën e madhe të Rusisë.
Dhe numërimi nuk përfshin separatistët rusishtfolës në Donbas. Në shkurt, shërbimet e inteligjencës britanike vlerësuan se ishin vrarë 40 mijë deri në 60 mijë trupa.
Ministria e Mbrojtjes e Ukrainës vlerëson se ka më shumë se 200 mijë viktima ruse - por këtu përfshihen edhe të plagosurit.
Të gjitha këto shifra e zbehin pretendimin rus prej rreth 6 mijë sosh.
Por sidoqoftë, edhe pse i paplotë, numërimi ka mundur të japë përgjigje për disa të afërm të viktimave, aty ku zyrtarët nuk kanë mundur.
Historia e Annas
Kur BBC-ja kontaktoi Annan - jo emri i saj i vërtetë - në dhjetor, ajo kishte vetëm dyshime për atë që kishte ndodhur me Fail Nabievin, ish-partnerin dhe babanë e vajzës së saj. "A mund të më tregoni se çfarë ndodhi?", tha ajo. “Nuk e di ku është varrosur apo si ka vdekur”.
Varri i Nabievit u gjet në Bakinskaya, dhe identiteti i tij u gjurmua nga BBC-ja.
Ai kishte vdekur më 6 tetor të vitit të kaluar në moshën 60-vjeçare, në luftime të ashpra në Bakhmut - ku të gjitha forcat e Wagnerit ishin të angazhuara në atë kohë.
Anna, e cila jeton në një rajon në verilindje të Moskës, tha se ajo mbeti shoqe me Nabievin pasi u ndanë: "Ai ishte një person i mirë".
Ajo tha se ai ishte i varfër dhe kishte nevojë për para, kështu që ai hynte në garazhe dhe vidhte pjesë makinash dhe makineri të tjera për t'i shitur ato. Kështu përfundoi në burg, ku u rekrutua nga Wagneri.
Konfirmimi i vdekjes së të burgosurve në njësitë e drejtuara nga grupi mercenar rus Wagner mund të jetë veçanërisht i vështirë. Kur Anna shkoi në zyrën lokale të rekrutimit ushtarak, ata thanë se nuk kishte të dhëna për Nabievin.
Përveç pasigurisë, mungesa e konfirmimit zyrtar për një vdekje gjatë luftës gjithashtu mund ta bëjë të vështirë kërkimin e pagave ose kompensimit.
“Doja të dija nëse ai ishte gjallë apo i vdekur. Në fund të fundit, përveç fjalëve tuaja, nuk kam asnjë informacion”, tha Anna për BBC-në. "Unë do të doja të merrja medaljet e tij, të paktën një lloj kujtese - ky person është i dashur për mua".
"25 milionë rezervistë"
Rusia beson se nëse thjesht mund të durojë, mbështetja perëndimore për Ukrainën përfundimisht do të thyhet, thotë Dr Jack Watling, eksperti i luftës tokësore në Rusi.
Nëse Ukraina mund të thyejë fortifikimet e Rusisë në kundërsulmin e saj të planifikuar prej kohësh, trupat e pakta dhe të papërvoja mund të pësojnë një "kolaps të rëndësishëm", thotë ai.
Por çfarëdo që të ndodhë, Dr Watling thotë se Rusia nuk ka gjasa të jetë pa trupa të tjera, duke përmendur ministrin e Mbrojtjes, Sergei Shoigu, për mobilizimin e civilëve të vendit. “Kur thotë: “Kam 25 milionë rezervistë”, nuk bën shaka. Ai është mjaft serioz për qëllimin”.
Kjo do të thotë se mesazhet për stafin e BBC-së që numërojnë viktimat ruse do të vazhdojnë të mbërrijnë, nga gra të tilla si Vera në Irkutsk, e cila është përpjekur prej muajsh të zbulojë se çfarë ka ndodhur me vëllain e saj, pas thashethemeve për vdekjen e tij në një njësi Wagner.
Edhe
Humbjet ruse në Ukrainë thyejnë çdo rekord pas Luftës II Botërore
"Ne nuk dimë ku të shkojmë, ku të kërkojmë ndihmë", thotë ajo. "Kemi pasur një fatkeqësi, si të arrijmë tek e vërteta?"
Përktheu: Forca Jashari
