Franca u kërkon qytetarëve të saj të evitojnë udhëtimet në Iran, Liban e Izrael

Franca u ka bërë thirrje qytetarëve të saj të premten që të përmbahen nga udhëtimet për në Iran, Liban dhe Izrael, dhe në territoret e okupuara palestineze.

Thirrja është bërë për shkak të paralajmërimeve për rritje të tensioneve në rajon, pas kërcënimeve të Iranit se do të hakmerret për sulmin izraelit në konsullatën e tij në Siri, raporton CNN.

Ministri i Jashtëm francez, Stephane Sejourne, ka lëshuar një udhëzues të ri mbi rrezikun e një “eskalimi ushtarak” pas një takimi krize, ka bërë të ditur në X Ministria e Jashtme franceze.

Familjet e stafit diplomatik në kryeqytetin iranian Teheran do të kthehen në Francë dhe nëpunësit civilë do të ndalohen nga misionet e punës në ato vende dhe territore.

Paralajmërimi erdhi ndërsa udhëheqësit e SHBA-së dhe Izraelit thanë se po përgatiteshin për një hakmarrje të mundshme nga Irani ose përfaqësuesit e tij pas një sulmi vdekjeprurës izraelit në kompleksin e konsullatës së tij në Siri javën e kaluar, duke vrarë komandantët e lartë iranianë.

Një sulm i ardhshëm iranian ishte një temë kryesore e diskutimit në bisedën telefonike të presidentit amerikan Joe Biden me kryeministrin izraelit Benjamin Netanyahu të enjten.