Dorëzohen luftëtarët e fabrikës së çelikut

Ende nuk dihet nëse ata do të shkëmbehen me robërit rusë të luftës. Polonia ndërkaq, i ka hapur rrugë eksportimit të grurit të Ukrainës pas bllokimit të porteve jugore nga Rusia. Gjermania ndërkohë, ka shprehur bindjen e plotë se do të kapërcehen pengesat turke për anëtarësim të shpejtë të Finlandës e Suedisë në NATO pas pushtimit rus të Ukrainës

Beteja për fabrikën e madhe të çelikut në Mariupol në Azovstal duket se po i afrohet fundit, pasi qindra ushtarë ukrainas të mbetur që qëndronin në objekt u evakuuan gjatë natës. Por presidenti ukrainas, Volodymyr Zelensky, ka lënë të kuptohet se disa ukrainas mbeten brenda uzinës.

Ushtria ukrainase thotë se mbrojtësit e Mariupolit kanë përfunduar misionin e tyre. Më shumë se 260 luftëtarë u larguan nga territori i kontrolluar nga Rusia. Ata pritet të shkëmbehen me robër rusë lufte.

Luftëtarët luftuan për 82 ditë me radhë. Rusia tashmë po kontrollonte pjesën tjetër të Mariupolit, qytet strategjik port jugor, që është rrafshuar nga bombardimet e rënda. Burimet ushtarake perëndimore thonë se Vladimir Putin tani është i përfshirë drejtpërdrejt në drejtimin e përditshëm të luftës, duke marrë vendime që zakonisht merren nga më shumë oficerë të rinj.

Korridori polak

Zëdhënësi i Kremlinit, Dmitry Peskov, nuk pranoi të komentojë mbi statusin e trupave të evakuuara dhe nuk u përgjigj nëse ushtarët ukrainas do të trajtoheshin si kriminelë lufte apo si robër lufte. Zëvendësministri i Jashtëm i Moskës ka thënë se aktualisht nuk po zhvillohen negociata mes Rusisë dhe Ukrainës. Rusia thotë se forcat e saj shkatërruan dërgesat e armëve amerikane dhe evropiane në rajonin perëndimor të Ukrainës, Lviv, me sulme raketore.

Në Varshavë, ministri polak i Bujqësisë tha se eksportet e grurit të Ukrainës mund të drejtohen përmes Polonisë për sa kohë që lufta do të mbajë të bllokuara portet detare të vendit në luftë. Henryk Kowalczyk diskutoi në Varshavë së bashku me ministrat amerikanë dhe ukrainas të bujqësisë, si dhe me komisarin e BE-së për Bujqësi.

Ukraina është shportë buke e Evropës. Eksportet e saj në tregjet botërore janë ndërprerë, duke kërcënuar të përkeqësojë mungesën e ushqimit, urinë dhe inflacionin në të gjithë botën. Kievi denoncoi vjedhjen e grurit të Ukrainës nga Rusia dhe përdorimin e urisë si mjet lufte.

Ministri polak tha se portet e vendit të tij në Detin Baltik janë të gatshme për t'u përdorur për të transportuar drithërat e Ukrainës jashtë vendit. Megjithatë, sfida më e madhe rezulton nga transporti tokësor nga Ukraina në Poloni, për shkak të dallimeve në matësit e hekurudhave të përdorura në Ukrainë dhe fqinjët e saj evropianë në perëndim.

Gjermania i prin mbështetjes për Finlandën e Suedinë

Në Berlin, ministrja e Jashtme gjermane, Annalena Baerbock, dhe homologu i saj danez, Jeppe Kofod, gjatë një konference shtypi shprehën mbështetjen e tyre për anëtarësimin e Suedisë dhe Finlandës në NATO pas ngritjes së kërcënimit rus ndaj Evropës. Baerbock është "shumë e sigurt" se Suedia dhe Finlanda do të anëtarësohen NATO, pavarësisht kundërshtimeve nga Turqia. Ajo tha se standardet ushtarake të dy vendeve nordike janë "më shumë se në përputhje me të NATO-s".

Prandaj, Gjermania vlerëson se është në interesin e vetë aleancës që shtetet nordike të jenë pjesë e saj. Kofod shprehu gjithashtu mbështetjen për pranimin e vendeve nordike, duke thënë se ato do të "forcojnë NATO-n dhe sigurinë e përbashkët".

Baerbock, e cila ishte nikoqire e takimit të ministrave të Jashtëm të NATO-s në fundjavë, tha se aleatët "kanë marrë parasysh" shqetësimet turke, porse është e sigurt se do të ketë “anëtarësim të shpejtë" pasi "të gjithë janë shumë të vetëdijshëm se ky është “moment vendimtar dhe historik” përballë kërcënimit rus.