Bullgaria s’do të dërgojë më armë në Ukrainë

Bullgaria nuk do të dërgojë më armë në Ukrainë, ka thënë të martën ministri i Mbrojtjes i vendit ballkanik, Dimitar Stoyanov. 

“Ne e kemi bërë tashmë të qartë se lufta në Ukrainë nuk do të zgjidhet në fushën e betejës”, ka thënë Stoyanov. 

Ajo që po dëshmojmë është një luftë rraskapitëse dhe pavarësisht se sa armë grumbullohen, rezultati i vetëm i saj është humbja e jetëve njerëzore, ka shtuar ai.

Kryeministri Rumen Radev, qeveria e të cilit ka marrë detyrën pas një fitoreje bindëse në prill, ka vite që kundërshton armatosjen e Ukrainës dhe në vend të kësaj bën thirrje për zgjidhje diplomatike. 

Bullgaria, e cila është anëtare e NATO-s dhe Bashkimit Evropian, i ka ofruar ndihmë ushtarake Ukrainës që kur Rusia ka nisur pushtimin e saj në shkallë të plotë në vitin 2022. 

Dërgesat e armëve kryesisht të epokës sovjetike kanë luajtur një rol të rëndësishëm në fazat e hershme të luftës. Për shkak të polemikave politike në vend, dërgesat janë bërë kryesisht përmes vendeve të treta.