Blinken i bën thirrje Serbisë ta lejojë mbajtjen e Paradës së Krenarisë

Sekretari amerikan i Shtetit, Antony Blinken, i ka bërë thirrje Serbisë ta lejojë mbajtjen e Paradës së Krenarisë në Beograd në vitin 2022.

"Liria e tubimit paqësor dhe e shprehjes janë komponentë thelbësorë të një demokracie të shëndetshme. Ne i bëjmë thirrje Serbisë të rishqyrtojë zotimin e saj për të pritur Paradën e Krenarisë. Të drejtat LGBTQI+ janë të drejta të njeriut", shkroi Blinken në Twitter të mërkurën.

Presidenti i Serbisë, Aleksandar Vuçiq, ditëve të fundit ka njoftuar se Parada e Krenarisë, që ishte planifikuar për në shtator, nuk do të mbahet.

Parada e Krenarisë është planifikuar të organizohet nga data 12 deri më 18 shtator dhe kjo datë dihet prej dy vitesh. Por, presidenti i Serbisë tha se kjo ngjarje nuk do të mbahet për shkak se vendi aktualisht është në një situatë të vështirë.

“Nuk mundemi në këtë moment kur kemi edhe Ballkanin e Hapur edhe krizën në Kosovë që nuk do të zhduket së paku deri në fund të tetorit, nuk kemi ku të shkojmë”, deklaroi ai.

Organizatorët e Paradës së Krenarisë njoftuan më pas se eventi do të mbahet sipas planit dhe ftuan të gjithë pjesëmarrësit të mblidhen para Kuvendit Kombëtar më 17 shtator.