Bjellorusia ekstradon babanë e vajzës ruse që vizatoi në shkollë kundër luftës

Bjellorusia ka ekstraduar një rus, i cili është ndarë nga vajza e tij dhe u dënua me dy vjet burgim pasi ajo bëri një vizatim kundër luftës, teksa ishte në shkollë, raportoi të mërkurën “The Guardian”.

Alexei Moskalyov, 54-vjeçari nga qyteti Yefremov u arratis nga arresti shtëpiak muajin e kaluar, disa orë para se një gjykatë t’i jepte dënimin me dy vjet për “diskreditim” të ushtrisë ruse.

Ai është arrestuar dy ditë më vonë në Bjellorusi, si rezultat i ndezjes së celularit dhe dënies së vendndodhjes së tij.

“Alexei Moskalyov u ekstradua nga Bjellorusia në Rusi”, tha grupi i të drejtave OVD-Info, duke cituar avokatin e tij në Bjellorusi.

Moskalyov tha se familja e tij fillimisht u përball me presionin nga policia prillin e kaluar kur vajza e tij 13-vjeçare, Maria Moskalyova, refuzoi të merrte pjesë në një klasë patriotike në shkollën e saj dhe bëri disa vizatime që tregonin raketa që hidheshin mbi një familje që qëndronte nën një flamur ukrainas dhe një tjetër vizatim ku thuhej "Lavdi Ukrainës".

Zyrtarët e shkollës në atë kohë thirrën policinë, e cila mori në pyetje vajzën dhe e kërcënoi të atin. Policia më pas filloi të shqyrtonte aktivitetin e Moskalyovit në rrjetet sociale dhe babai u akuzua për diskreditimin e forcave të armatosura për postet e tij në të cilat ai e quajti regjimin rus "terrorist" dhe e përshkroi ushtrinë ruse si "përdhunuese".

Edhe Botë 30 mar 2023 Dënimet “artistike” ruse

Vajza e Moskalyovit u vendos në një strehë për fëmijë menjëherë pas arrestimit të tij. Javën e kaluar, komisionerja për të drejtat e fëmijëve në Kremlin, Maria Lvova-Belova, tha se vajzën e Moskalyovit e ka marrë nëna e saj nga jetimorja.

Moskalyov, i cili ka të ngjarë të kalojë dy vitet e ardhshme në një burg rus, është gjithashtu në rrezik të humbjes së të drejtave prindërore në një gjyq të veçantë.