Aleatët evropianë: Plani do ta linte Ukrainën të cenueshme ndaj sulmeve

Aleatët perëndimorë të Ukrainës e kanë kundërshtuar publikisht planin e ri të qarkulluar për fundin e luftës.

Në një deklaratë të përbashkët të lëshuar të shtunën në samitin e G20-s në Afrikën e Jugut, ata kanë thënë se plani “do ta linte Ukrainën të cenueshme ndaj sulmeve”.

Propozimi, thuhet në deklaratë, ka elementë “thelbësorë për një paqe të drejtë dhe të qëndrueshme”, por do të “kërkonte punë shtesë” - duke përmendur shqetësime mbi ndryshimet kufitare dhe kufizimet në ushtrinë e Ukrainës.

Deklarata u nënshkrua nga udhëheqësit e Kanadasë, Finlandës, Francës, Irlandës, Italisë, Japonisë, Holandës, Spanjës, Mbretërisë së Bashkuar, Gjermanisë dhe Norvegjisë. Dy zyrtarë të lartë të BE-së ishin gjithashtu midis nënshkruesve.

Presidenti francez, Emmanuel Macron, ka thënë se plani ”nuk mund të jetë thjesht një propozim amerikan”, duke shtuar se çdo marrëveshje duhet të garantojë edhe sigurinë për “të gjithë evropianët”.

Kancelari gjerman, Friedrich Merz, ka thënë se “jemi ende mjaft larg një rezultati të mirë për të gjithë”.