Partia gjermane e ekstremit të djathtë Alternativa për Gjermaninë (AfD) është përjashtuar nga grupi parlamentar pan-evropian pas një sërë polemikash mbi zgjedhjet dhe sjelljen e disa prej liderëve të saj, shkruan The Guardian.
“Byroja e grupit të Identitetit dhe Demokracisë në Parlamentin Evropian ka vendosur sot të përjashtojë delegacionin gjerman, AfD, me efekt të menjëhershëm”, ka thënë në një deklaratë grupi ID i partive populiste të ekstremit të djathtë.
Një ditë më parë, kandidati kryesor i AfD-së në zgjedhjet evropiane të qershorit, Maximilian Krah, dha dorëheqjen nga lidershipi i partisë dhe hoqi dorë nga të gjitha aktivitetet e fushatës pas kritikave që mori për komentet e bëra fundjavën e kaluar duke thënë se nazistët “nuk ishin të gjithë kriminelë”.
“Grupi ID nuk dëshiron më të lidhet me incidentet që përfshijnë Maximilian Krahun, kreun e listës së AfD-së për zgjedhjet parlamentare evropiane”, ka shkruar grupi ID në Facebook.
ID-ja kishte planifikuar ta përjashtonte AfD-në pas zgjedhjeve evropian, por komentet e Krahut përshpejtuan vendimin me shumicë votash.
Krahu i bëri komentet në një intervistë për “La Repubblica”. Partia e ekstremit të djathtë në Francë (RN), anëtar kyç i grupit ID së bashku me AfD-në nga viti 2019, pas intervistës së Krahut, ka thënë se nuk do të jetë në të njëjtin grup me partingë gjermane pas zgjedhjeve.
Edhe
Inteligjenca gjermane pezullon klasifikimin “ekstremiste” për AfD-në
Marine Le Pen, udhëheqësja e RN, ka akuzuar AfD-në se po mbahet peng nga elementët radikalë.
Grupi ID përbëhet nga partia e Matteo Salvinit në Italia, partia e Lirisë së Austrisë (FPO), partia e Lirisë në Holandë e Geert Wildersit (PVV) dhe Vlaams Belang i Belgjikës.
Ky grup parashihej fitues i zgjedhjeve të 6-9 qershorit për Parlamentin Evropian. Sondazhet parashikuan se numri i deputetëve të fituar do të rritej nga 59 në 85. Por përjashtimi i AfD-së do të ulë këto shifra.
