Presidenti i ri i Iranit, Masoud Pezeshkian, po përpiqet të zbusë shkallën e përgjigjes së Teheranit ndaj Izraelit për vrasjen e liderit të Hamasit, Ismail Haniyeh, raporton “Telegraph”.
Korpusi i Gardës Revolucionare të Iranit (IRGC) po do që hakmarrjen ta realizojë me sulm me raketa në Tel Aviv dhe qytete të tjera kundër objekteve ushtarake izraelite.
Megjithatë, Pezeshkian, nga frika e një lufte më e madhe me Izraelin, po kërkon që Irani në vend të kësaj të godasë bazat e spiunazhit të Mossadit të fshehura në rajon.
“Ai sugjeroi që të shënjestrohen objektiva të lidhura me Izraelin në Republikën e Azerbajxhanit ose Kurdistanin”, ka thënë një burim për gazetën britanike.
Një zyrtar i IRGC-së ka thënë se askush në organizatë, e cila është besnike ndaj udhëheqësit suprem Ali Khamenei, nuk i kushton shumë vëmendje Pezeshkianit.
“Kishte një diskutim brenda forcës se si të bllokohen përpjekjet e Pezeshkianit. Pothuajse të gjithë besojnë se ajo që ai po këmbëngul nuk është e mirë për reputacionin e autoriteteve iraniane”, ka thënë ky zyrtar.
